Goa Congress सांकवाळ येथील घटनेनंतर राज्यात टँकरद्वारा पाणी पुरवठा प्रकरण चांगलेच तापले आहे. याच पार्श्वभूमीवर आज काँग्रेस अध्यक्ष अमित पाटकर यांच्या नेतृत्वाखालील काँग्रेसच्या शिष्टमंडळाने जलस्रोत विभागाचे मुख्य अभियंता प्रमोद बदामी यांची भेट घेतलीय.

यावेळी जलस्रोत विभागाचे मुख्य अभियंता प्रमोद बदामी यांनी गोमंतकीयांना पिण्यासाठी टँकरचे पाणी न वापरण्याचे आवाहन केले.

सांकवाळ येथील पाण्याच्या टँकरमध्ये सांडपाणी वाहून नेल्याची घटना उघडकीस आल्यापासून गोव्यात पाणी पुरवठा प्रकरणी चांगलेच वातावरण तापले आहे. या प्रकरणी काँग्रेसचे अमित पाटकर यांनी राज्य सरकारवर घणाघात केला होता.

"मुख्यमंत्री डॉ. प्रमोद सावंत आणि आरोग्यमंत्री विश्वजित राणे यांच्या नेतृत्वाखालील भाजप सरकार लोकांच्या जीवाशी खेळत असून गोव्यातील नागरिकांच्या जगण्याच्या हक्काचे संरक्षण करण्यात अपयशी ठरले आहेत," असा आरोपही अमित पाटकर यांनी केला होता.

यापूर्वी काँग्रेस पक्षाच्या कार्यकर्त्यांनी सार्वजनिक बांधकाम विभागाच्या कार्यालयास भेट दिली होती. त्यावेळी राज्यात 80 एमएलडी पाण्याचा तुटवडा असून या तुटवड्यामुळेच जनतेला टँकरच्‍या पाण्‍यावर अवलंबून राहावे लागते असे अधिकाऱ्यांनी कबूल केले होते.

आणि आता जलस्रोत विभागाचे प्रमोद बदामी यांनी गोवासियांना पिण्यासाठी टँकरचे पाणी न वापरण्याचे आवाहन केले आहे.