मडगाव: मडगाव पालिकेने ११ एलडीसीसह अन्‍य दोन जागा भरण्‍यासाठी प्रक्रिया सुरू केली असून ही प्रक्रिया वादात सापडण्‍याची शक्‍यता निर्माण झाली आहे. एकाबाजूने विरोधकांनी काही नगरसेवकांना आपल्‍या वाशिल्‍याचे तट्‍टू भरण्‍यासाठी ही प्रक्रिया सुरू केल्‍याचा आरोप केला आहे,
तर नगराध्‍यक्ष दामोदर शिरोडकर यांनी हे सर्व आरोप खोडून कर्मचाऱ्यांअभावी पालिकेच्‍या कामाचा खोळंबा होतो, असा आरोप जे कोण करत आले आहेत, तेच आता या भरतीला विरोध करतात ही आश्‍चर्याचीच गोष्‍ट, अशी प्रतिक्रिया व्‍यक्‍त केली.
मडगाव पालिकेने ११ एलडीसीसह एक साईट सुपरवायझर आणि एक सहाय्‍यक गवंडी अशा एकूण १३ जागा भरण्‍यासाठी जाहिरात दिली असून याची प्रक्रिया कालपासून सुरू झाली. अर्ज करण्‍यासाठी ११ नोव्‍हेंबरपर्यंत मुदत आहे. ११ एलडीसीच्‍या पाच जागा खुल्‍या गटासाठी असून प्रत्‍येकी दोन जागा ‘ओबीसी’ व ‘एसटी’साठी तर प्रत्‍येकी एक जागा आर्थिक दुर्बल आणि दिव्‍यांगांसाठी राखीव आहे, तर दोन पदे खुल्‍या गटासाठी आहेत.
मागच्‍या वर्षी टीका झाल्यामुळे नंतर ही पूर्ण प्रक्रियाच रद्द झाली होती. पुन्हा प्रक्रिया सुरू झालीय,पण यातील अन्‍य सर्व पदासाठी कोंकणीचे ज्ञान सक्‍तीचे असताना ‘साईट सुपरवायझर’साठी कोंकणीची अट ठेवलेली नाही. यामुळेही विरोधकांनी मडगाव पालिकेला लक्ष्‍य केले आहे.
मडगावचे नगराध्‍यक्ष दामोदर शिरोडकर यांनी, सर्व आरोप फेटाळून लावले. साईट सुपरवायझर पदासाठी कोकणीची अट का शिथिल केली असा प्रश्‍न विचारला असता, पालिकेच्‍या भरती नियमात या एका पदासाठी ही अट ठेवलेली नाही, त्‍यामुळेच आम्‍ही ही अट घातलेली नाही.
जे कोण हा आरोप करतात ते स्‍वत: पूर्वी नगराध्‍यक्ष होते. त्यांना या नियमाची माहिती नाही का? असा सवाल करून पुन्हा असे आरोप झाल्‍यास त्यांना सडेतोड उत्तर देऊ, असा इशारा दिला.
शॅडो कौन्‍सिलचे अध्यक्ष सावियो कुतिन्‍हो यांनी एकाच पदासाठी ही अट का शिथिल केली, असा सवाल केला. प्रभव नायक यांनी, दोन दिवसांपूर्वी मुख्‍यमंत्र्यांनी सर्व गट ‘क’ मधील कर्मचाऱ्यांची निवड आयोगामार्फत केली जाईल, असे सांगितले, पालिका ११ एलडीसीची थेट कशी भरती करते, असा सवाल केला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.