पणजी: देशाच्या राष्ट्रपती द्रौपदी मुर्मू चार दिवसांच्या गोवा, कर्नाटक आणि झारखंडच्या दौऱ्यावर येणार आहेत. मुर्मू या दौऱ्याच्या कालावधीत विविध कार्यक्रमात सहभाग घेतील. त्या कारवार येथील बंदरातून पाणबुडी सफर देखील करणार आहेत.

पीआयबीने प्रसिद्ध केलेल्या पत्रकानुसार, राष्ट्रपती मुर्मू २७ ते ३० डिसेंबर या कालावधीत गोवा, कर्नाटक आणि झारखंड राज्यांना भेट देतील. २७ डिसेंबर रोजी संध्याकाळी त्या गोव्यासाठी रवाना होतील. २८ डिसेंबर रोजी त्या कर्नाटकच्या कारवार येथील बंदरात दाखल होतील. या बंदरात त्या बाणबुडीतून सागरी सफर करणार आहेत.

२९ डिसेंबर रोजी राष्ट्रपती मुर्मू झारखंडमधील जमशेदपूर येथे हजेरी लावतील. येथील ओल चिकीच्या शताब्दी सोहळ्यात त्या उपस्थित राहणार आहेत. याच दिवशी त्या एनआयटीच्या १५ व्या दीक्षांत समारंभालाही संबोधित करतील.

राष्ट्रपती मुर्मू ३० डिसेंबर रोजी झारखंड येथील गुमला आंतरराष्ट्रीय समागम सोहळ्यात सहभागी होतील. या सोहळ्यात त्या कार्तिक यात्रा कार्यक्रमाला संबोधित करणार आहेत. दरम्यान, राष्ट्रपतींच्या दौऱ्यामुळे गोव्यात ड्रोन उड्डाणावर बंदी घालण्यात आली आहे. २७ आणि २८ डिसेंबर रोजी एरियल व्हिडिओग्राफी, फोटोग्राफीवर बंदी घातली आहे.