पणजी: गोव्याचे (Goa) नवे राज्यपाल पी. एस. श्रीधरन पिल्लई (Governor P. S. Sreedharan Pillai) शपथविधी 15 किंवा 16 जुलै रोजी होऊ शकतो. मुख्यमंत्री डॉ प्रमोद सावंत (Dr. Pramod Sawant) यांची त्यांच्याशी काल याबाबत बोलणी झाली. मुख्यमंत्र्यांना याबाबत विचारले असता ते म्हणाले, नव्या राज्यपालांचे स्वागत करण्यासाठी काल मी त्यांच्याशी दूरध्वनीवरून बोललो. त्यांनी मला पंधरा किंवा सोळा तारीखेला पण गोव्यात पोहोचेन असे सांगितलेले आहे. येत्या एक-दोन दिवसात त्यांच्या शपथविधीची तारीख निश्चित केली जाईल. 15 किंवा 16 जुलैला हा शपथविधी होऊ शकतो.

मंत्रिमंडळ बैठकीनंतर मुख्यमंत्र्यांनी सांगितले की गोव्याच्या ग्रामीण भागांमध्ये ऑनलाईन शिक्षणासाठी मोबाईलची रेंज नसणे ही प्रमुख समस्या आहे. त्यावर मात करण्यासाठी आता सरकारी जागेमध्ये खासगी मोबाईल कंपन्यांनी मनोरे उभारण्यासाठी भुखंड वापराच्या निर्धारित भाड्याच्या केवळ दहा टक्के भाडे देणे बंधनकारक केले आहे.