Margao Municipality: मडगाव शहरात अनेक ठिकाणी शेकडो बेवारस वाहने पडून आहेत. काही वाहनांचे पत्रे, टायर खराब झाले आहेत. या वाहनांमुळे शहराच्या सौंदर्यालाही बाधा पोहोचते. आता मडगाव नगरपालिकेतील नगरसेवकांनी ही बाब नगराध्यक्ष व मुख्याधिकारी यांच्या लक्षात आणून दिली असून ही वाहने ताबडतोब हटविण्याची मागणी केली आहे.

दरम्यान, यासंदर्भात नगराध्यक्ष दामोदर शिरोडकर यांनी सांगितले की, ही वाहने हटविताना काही नियम तसेच कायदेकानून पाळावे लागतात. प्रत्येक गाड्यांचे नंबर नोंद केले असून प्रथम त्या गाड्यांच्या मालकांना पत्रे पाठवून ती हटविण्याची विनंती केली जाईल. जर प्रतिसाद मिळत नसेल तर मात्र नगरपालिकेला ती हटवावी लागतील.

मात्र, नेमकी कोणत्या दिवशी किंवा तारखेला ती हटविणार हे आताच निश्र्चितपणे सांगता येणार नाही. ही वाहने मुख्य रस्त्यावर नाहीत; पण आतील भागातील रस्त्यांवर आहेत. तरीही ती हटवावीच लागतील.

यादीत 98 वाहने

एका महिन्यापूर्वी आपण हा प्रश्र्न उपस्थित केला होता. या वाहनांबद्दल नगरपालिकेने दक्षिण गोवा जिल्हाधिकारी व नगरपालिका प्रशासन संचालनालयाला पत्र लिहून त्यांची परवानगी मागितली आहे. शहरात जवळ जवळ 98 बेवारस वाहनांची यादी तयार केली आहे, नगराध्यक्ष दामोदर शिरोडकर यांनी सांगितले.

महेश आमोणकर, नगरसेवक-

आपल्या प्रभागात अशी कित्येक वाहने पडून आहेत. याचा लोकांना त्रास होत आहे. त्यामुळे आपण नगराध्यक्ष व मुख्याध्याकाऱ्यांना पत्र लिहून ती हटविण्याची मागणी केली.