राज्यात सनबर्न फेस्टिव्हलच्या दक्षिण गोव्यातील आयोजनावरुन वातावरणं चागलंच तापलं आहे. विरोधक सनबर्नच्या आयोजनावरुन सत्ताधारी पक्षावर सडकून टिका करतायेत. दक्षिण गोव्यात ड्रग्ज संस्कृतीचा आणण्याचा हा प्रयत्न असल्याचे विरोधकांचे म्हणणे आहे. दरवर्षी वागतोर येथे सनबर्न फेस्टिव्हल साजरा केला जातो. मात्र यावर्षी सनबर्नचे ठिकाण बदल्याने राजकारण चांगलेच तापले. यातच आता, बेताळभाटी ग्रामसभेत दक्षिण गोव्यातील सनबर्न फेस्टिव्हलच्या विरोधाचा ठराव एकमताने मंजूर करण्यात आला. सनबर्न फेस्टिव्हलचा मुद्दा उपस्थित होताच ग्रामसभेत उपस्थित असणाऱ्या नागरिकांनी एकमताने कडाडून विरोध केला.

सनबर्न फेस्टिव्हलचे गोव्यात होणारे आयोजन फक्त ड्रग्ज सेवन करण्यासाठीच असते. त्यामुळे हा संगीत महोत्सव आयोजित करण्यासाठीं कुठलीही परवानगी या आयोजकांना देण्यात येऊ नये, अशा मागणीचे निवेदन काही दिवसांपूर्वी काँग्रेस नेते जना भंडारी यांनी मुख्य सचिवांना दिले होते.

तर दुसरीकडे, दक्षिण गोव्यात सनबर्नचे आयोजन होणार हे सरकारने सोडलेले पिल्लू आहे, असे म्हणत गोवा फॉरवर्ड पक्षाचे सर्वेसर्वा आणि आमदार विजय सरदेसाई यांनी सरकारवर हल्लाबोल केला होता.

तसेच, वेळ्ळीचे आमदार क्रुझ सिल्वा व बाणावलीचे माजी आमदार चर्चिल आलेमाव यांनी या महोत्सवाला आपला विरोध असून जे कोण या महोत्सवाला विरोध करतात त्यांना आपला पूर्ण पाठिंबाही जाहीर केला. क्रुझ सिल्वा यांनी सांगितले की, या महोत्सवामुळे उत्तर गोव्याची काय परिस्थिती झाली आहे हे आम्ही पाहिली आहे.