Purple Fest : दिव्यांगजन आयोग, समाज कल्याण संचालनालय आणि गोवा मनोरंजन संस्था यांच्या सहकार्याने राष्ट्रीय पर्पल फेस्टची तयारी अंतिम टप्प्यात आली आहे. या उपक्रमासाठी प्रमुख वक्ते म्हणून भारताचे सरन्यायाधीश डॉ. डी. वाय. चंद्रचूड हे बीजभाषण करणार आहेत, अशी माहिती समाज कल्याण मंत्री सुभाष फळदेसाई यांनी दिलीय. मात्र या फेस्टवरून आता गोव्यातील राजकीय वातावरण तापण्याची चिन्ह आहेत. पर्पल फेस्टच्या मुद्द्यावर विरोधकांनी सरकारवर हल्लाबोल चढवला आहे.

या 6 ते 8 जानेवारी होणाऱ्या या तीन दिवसीय महोत्सवादरम्यान गोवा मनोरंजन संस्थेचे संकुल, माकिनेज पॅलेस, आयनॉक्स पणजी, मनोहर पर्रीकर इन्डोअर स्टेडियम-काम्पाल, संजय विशेष स्कूल-पर्वरी, डॉ. श्यामाप्रसाद मुखर्जी स्टेडियम- बांबोळी, गेरा स्कूल-जुने गोवे, धारबांदोडा, फोंडा येथे विविध उपक्रमांचे आयोजन केले आहे. मात्र या कार्यक्रमाची निविदा प्रक्रिया उघडण्याआधीच भाजप सरकारकडून काम कसे काय पार पडले असा सवाल गोवा प्रदेश काँग्रेसचे अमरनाथ पणजीकर यांनी उपस्थित केला आहे.

अमरनाथ पणजीकर यांनी या कार्यक्रमाच्या तयारीचा व्हिडीओ शेअर करत सरकारवर हल्लाबोल चढवला आहे. "पर्पल फेस्ट 2023 चा पहिला घोटाळा आहे. फेस्टची निविदा 2 जानेवारी रोजी याची काढली जाणार आहे. परंतु भाजपच्या इनहाऊस एजन्सीने त्या अगोदरच हे काम सुरू केले आहे. गोवा राज्य अपंग व्यक्ती आयोग याची दखल घेऊन कारवाई करेल. लोकायुक्तांचे हे कृत्य भ्रष्टाचारी आह. या कृत्यामुळे त्यांची समाजाप्रती असंवेदनशीलता उघड करते," असे पणजीकर यांनी म्हटले आहे.