Goa Politics:

लोकसभा निवडणुकीसाठी दक्षिण गोव्यातून महिला उमेदवार निवडण्याचा पेच कसा सोडवावा, या चिंतेत भाजपचे स्थानिक नेतृत्व असतानाच मुख्यमंत्री डॉ. प्रमोद सावंत उद्या शनिवारी दिल्लीत केंद्रीय गृहमंत्री अमित शहा यांची भेट घेणार आहेत.

दक्षिण गोव्यातून भाजपच्या उमेदवारीसाठी इच्छुक असलेल्यांना मुख्यमंत्री काहीतरी करिष्मा करून केंद्रीय नेतृत्वाचा महिला उमेदवाराबाबतचा आग्रह त्यांना सोडण्यास भाग पडतील, असे वाटते.

सरकारी कामानिमित्त होणाऱ्या या भेटीवेळी पर्यावरणमंत्री आलेक्स सिक्वेरा हेही उपस्थित असतील. सध्या लोकसभा निवडणुकीचे वारे वाहत असल्याने शहा यांच्या भेटीवेळी मुख्यमंत्री राजकीय चर्चा करतील, अशी अपेक्षा बाळगली जात आहे.

दक्षिण गोव्यातील राजकीय वातावरण भाजपसाठी आजवर केवळ दोनच वेळा पोषक होते. आताही भाजपकडे दक्षिण गोव्यात आमदार संख्या बळकट असली, तरी दाबोळी विमानतळ, पोर्तुगीज नागरिकत्व आदी मुद्दे भाजपसाठी त्रासदायक ठरू शकतील, अशी चर्चा राजकीय वर्तुळात आहे.

दक्षिण गोव्याचा उमेदवार ठरविताना फार राजकीय प्रयोग केले जाऊ नयेत, असे भाजपच्या स्थानिक नेतृत्वाला वाटते. मुख्यमंत्री हा संदेश शहा यांच्यापर्यंत पोचवतील, अशी चर्चा भाजपच्याच वर्तुळात आहे. त्यामुळे उद्या होणाऱ्या या बैठकीकडे भाजपसह इतर राजकीय पक्षांचेही लक्ष लागून राहिले आहे.