Bodgeshwar Temple In Mapusa: म्हापसा येथील जागृत देवस्थान श्रीदेव बोडगेश्वर मंदिरातील चोरी प्रकरणातील चारही संशयित चोरट्यांना म्हापसा न्यायालयाने अतिरिक्त तीन दिवस पोलिस कोठडी सुनावली.

चोरी प्रकरणातील राजू फरत शेख (२७, रा कोलकाता, पश्चिम बंगाल व मूळ बांगलादेश), इम्रान शहीद शेख (२४, रा. सुरत गुजरात), राकीब कुलमोहम्मद शेख (२८, रा. सुरत गुजरात) व मुजाहिद गुलजार खान (२८, रा. पुणे व मूळ झारखंड) यांना मंगळवारी २१ रोजी पोलिसांनी म्हापसा न्यायालयात हजर केले असता संशयितांना अजून तीन दिवस पोलीस कोठडीत ठेवण्याचा आदेश दिला.

म्हापसा पोलिसांनी शनिवारी ११ रोजी संशयित आरोपींना खोपोली महाराष्ट्र पोलिसांकडून हस्तांतरित पध्दतीने ताब्यात घेत अटक केली होती. त्यानंतर संशयितांना न्यायालयाने ९ दिवसांची पोलिस कोठडीत सुनावली होती.

गेल्या २९ एप्रिल २०२४ रोजी उत्तररात्री २.०५ ते २.३८ च्या सुमारास हा बोडगेश्वर मंदिरात चोरीचा प्रकार घडला होता. चार अज्ञात चोरट्यांनी मंदिरातील सुरक्षारक्षक फिर्यादी दशरथ ठाकूर (६१) यांना धमकावून व खुर्चीला बांधून दोन फंडपेट्या फोडल्या होत्या.