गोवा विधानसभेचे पावसाळी अधिवेशन सध्या सुरु आहे. अधिवेशानत गेल्या काही दिवसांपासून राज्यात गाजत असणाऱ्या अनेक मुद्यांवरुन विरोधक सरकारला घेरत आहेत. यातच आता, एक मोठी बातमी समोर आली आहे. विकसित गोवा 2024 डॉक्युमेंट तयार करण्यासाठी बोस्टन कंस्टल्टिंग ग्रुपला दिलेले 7.20 कोटी रुपयांचे कंत्राट रद्द करण्यात आले आहे. मुख्यमंत्री डॉ. प्रमोद सावंत यांनी सभागृहात दोन दिवसांपूर्वी बोस्टन कंस्टल्टिंग कंपनीचे कंत्राट रद्द केल्याची माहिती दिली होती. त्यानंतर आता यासंबंधीची नोटीस जारी करण्यात आली आहे.

दरम्यान, गोवा फॉरवर्ड पक्षाचे प्रमुख विजय सरदेसाई यांनी विधानसभेत अर्थसंल्पावर बोलताना सरकारच्या या वर्क ऑर्डरबाबत प्रश्नचिन्ह उपस्थित केले होते.

सरदेसाई म्हणाले होते की, 'बोस्टन ग्रुपला गोव्याची अजिबात ओळख नाही.' गोव्यातील गावांची ओळख नसताना एक डॉक्युमेंट तयार करण्यासाठी एवढे पैसे का दिले जातायेत? असा सवालही त्यांनी केला होता. त्यावर उत्तर देताना मुख्यमंत्री डॉ. प्रमोद सावंत यांनी BCG चा पहिला इन्सपेक्शन रिपोर्ट बघूनच हा करार रद्द केला असल्याचे सभागृहात सांगितले होते. निती आयोगाने बोस्टनची नेमणूक केली असल्याने आम्हीही त्याच कंपनीवर विश्वास ठेऊन करार केला होता. आता हा करार रद्द करण्यात आला आहे.