आग्वाद कारागृहात बार सुरु केल्याने कळंगुट मतदार संघ नाराज झाला असून त्यांच्यामधून संतप्त प्रतिक्रिया येत आहेत. कारागृहात बार सुरु करून गोवा सरकार आणि पर्यटन खात्याने अक्षरशः स्वातंत्र्य सैनिकांचा अपमान केला असल्याची प्रतिक्रिया कळंगुट मतदार संघातून येतेय. या प्रकरणी सहभागी असलेल्या अधिकाऱ्यांची चौकशी करून त्यांना निलंबित करावे अशी मागणी करण्यात आली आहे.

काही दिवसांपूर्वी यासंदर्भात नवजीवन सोसायटी ऑफ फ्रिडम फायटर असोसिएशनचे अध्यक्ष अविनाश शिरोडकर यांनीही आपली आक्रमक भूमिका मांडली होती. पत्रकारांशी संवाद साधताना ते म्हणाले होते की, आग्वाद किल्ला हा आपल्या प्रत्येकासाठी एक ऐतिहासिक वास्तू आहे. गोव्याला मुक्ती देण्यासाठी अनेक स्वातंत्र्यसैनिकांनी आपल्या प्राणांची आहुती दिली.

अशा ठिकाणी मद्यालय असणे ही अतिशय वाईट गोष्ट आहे. आपण किमान स्वातंत्र्यसैनिकांच्या त्यागाचा आदर म्हणून तरी अशा गोष्टी बंद केल्या पाहिजेत. त्यामुळे मी असोसिएशनतर्फे हे मद्यालय ताबडतोब बंद करण्याची मागणी करतो. त्याचबरोबर या प्रकरणात मुख्यमंत्री प्रमोद सावंत आणि पर्यटन मंत्री रोहन खंवटे यांनी लक्ष घालावे अशी विनंती करतो.

आग्वाद किल्ला हे इथल्या अनेक पर्यटन स्थळांपैकी एक आहे. त्यामुळे अशा ठिकाणी मद्य विक्री सुरू असल्यामुळे अनेकांनी यावर प्रश्न उपस्थित केले आहेत.