पर्वरी: येत्या काही दिवसांमध्ये पर्वरी शहरात एक मोठा प्रकल्प उभा राहण्याची शक्यता आहे. ११० कोटी रुपयांच्या टाऊन स्क्वेअरच्या विकासामुळे पर्वरी शहराला वेळीच कलाटणी मिळण्याची शक्यता आहे. गोवा पर्यटन विकास महामंडळ (GTDC) ने या प्रकल्पासाठी निविदा जारी केली आहे. हा प्रकल्प गोवा गृहनिर्माण मंडळाने प्रदान केलेल्या १०,९२३ चौरस मीटर जागेवर बांधला जाईल.

पर्वरीतील नियोजित टाऊन स्क्वेअरमध्ये विविध प्रकारचे अनुभव देणारे पाच वेगळे झोन तयार केले जातील.

हायलाइट्समध्ये एक संगीत कारंजे, वॉचटॉवर, स्प्लॅश पॅड आणि प्रोजेक्शन मॅपिंग क्षमता असलेले मूव्ही कोर्ट असलेले सेंट्रल कोर्ट यांचा समावेश आहे आणि बाकी वैशिष्ठ्यांमध्ये ॲम्फीथिएटर, मार्केट कोर्ट, फूड कोर्ट, फ्ली मार्केट, पॉप-अप बाजार, दुकाने आणि बहु-कार्यक्षम जागा नियोजित करण्यात आली आहे. शिवाय या ठिकाणी २०० वाहनांसाठी बेसमेंट पार्किंगचीही व्यवस्था केली जाईल.

स्थानिक कला आणि परंपरांवर भर देत पर्वरीत उभ्या राहण्याऱ्या टाऊन स्क्वेअरमध्ये हेरिटेज कोर्टचा समावेश करण्यात येणार आहे. पर्यटन मंत्रालयाने या उपक्रमासाठी आधीच ९०.७४ कोटी रुपये मंजूर केले आहेत आणि आता जीटीडीसी निविदा प्रक्रियेसह पुढे जात आहे. हा प्रकल्प उभा राहण्यासाठी आवश्यक असलेल्या जागेसाठी जमीन हस्तांतरणाचा प्रस्तावही पर्यटन विभागाने गृहनिर्माण मंडळाकडे सादर केला आहे. पर्वरीत उभ्या राहणाऱ्या या टाऊन स्क्वेअरमुळे स्थानिक तसेच पर्यटकांना गोव्यातील संस्कृतीचा अनुभव घेण्याची संधी मिळेल.