Goa Ferry Boat: राज्यातील सर्वात जास्त वापर असणाऱ्या आणि सतत व्यस्त असणाऱ्या चोडण ते रायबंदर या जलमार्गावर नदी परिवहन खात्याने रो-रो या कमी अवजड वाहतूक करणारी वाहने आणि प्रवासी वाहतूक करणाऱ्या दोन बोटी तयार करून घेण्याचे निश्‍चित केले आहे.

बांधा आणि चालवा या धर्तीवर या दोन बोटी बांधल्या जाणार असून, त्यासाठी खात्याने 10 कोटींची निविदा काढलेली आहे.

नदी परिवहन खात्याचा पदभार सुभाष फळदेसाई यांच्याकडे आल्यापासून त्यांनी खात्याच्या कामात तत्परता आणण्याचा प्रयत्न केला आहे. त्याशिवाय २०२१ मध्ये त्यांनी नदी परिवहनच्या अधिकाऱ्यांना घेऊन केरळमध्ये जाऊन रो-रो फेरीबोट सेवेची पाहणी केली होती. तत्कालीन बंदर कप्तान विभागाचे कॅप्टन जेम्स ब्रागांझाही हेसुद्धा पाहणीसाठी गेले होते.

त्यावेळी केरळमध्ये पाहिलेल्या ‘रो-रो’ फेरीबोटीची त्यावेळची किंमत साधारण दहा कोटी रुपये होत आणि ती आकारानेही मोठी होती.

परंतु गोवा सरकारने पाच-पाच कोटींना त्या रो-रो फेरीबोटी बांधण्यासाठीची निविदा काढली आहे. चोडण ते रायबंदर या मार्गावर नदी परिवहन खात्याला चार किंवा तीन फेरीबोटी चालवाव्या लागतात.

सर्वात जास्त प्रवासी व वाहनांची वाहतूक करणारा हा मार्ग आहे. त्यामुळे नदी परिवहन खात्याने जी रो-रो फेरीबोटीची निविदा काढली आहे. त्या फेरीबोटीमध्ये १२ ते १४ चार चाकी वाहने अथवा कमी वजनाची मालवाहतूक करणारी वाहने आणि ५० प्रवासी वाहतूक करता येईल अशी बांधणी असावी.