सासष्टी: आंतरराष्ट्रीय चित्रपट महोत्सव २० ते २८ नोव्हेंबर या कालावधीत होणार आहे. यंदा या महोत्सवाचा एक भाग असलेल्या मडगाव रवींद्र भवनची गोवा मनोरंजन सोसायटी तसेच इफ्फीच्या तांत्रिक अधिकाऱ्यांकडून पाहणी करण्यात आली. त्यावेळी काही सूचनाही करण्यात आल्या. त्यानुसार तियात्रिस्ट सभागृहाची दुरुस्ती केली जाणार आहे. त्यामुळे हे सभागृह तियात्र तसेच इतर कार्यक्रमांसाठी बंद ठेवावे लागणार आहे.

रवींद्र भवनचे अध्यक्ष राजेंद्र तालक यांनी सर्व तियात्र निर्माते व दिग्दर्शकांची बैठक बोलावून त्यांना या संदर्भात सूचना केल्या. यावेळी काही जणांनी ऑक्टोबरच्या पहिल्या आठवड्यात तियात्रांसाठी सभागृह उपलब्ध करावे, अशी विनंती केली आहे. या संदर्भात रवींद्र भवनचे अध्यक्ष राजेंद्र तालक यांच्याशी संपर्क साधला असता, ते म्हणाले, यंदा आंतरराष्ट्रीय चित्रपट महोत्सवातील काही चित्रपट येथे प्रदर्शित केले जातील.

चित्रपटासाठी पडदा, प्रोजेक्टर, नवी ध्वनी योजना यात सुधारणा केली जाईल. आधुनिक तंत्रज्ञानाने युक्त अशी ध्वनी योजना बसवली जाईल. त्यामुळे चित्रपटांबरोबर नाटक, तियात्र किंवा संगीत कार्यक्रमासाठी सुद्धा ही योजना उपयुक्त ठरेल असेही तालक यांनी सांगितले.