पणजी: करमळी येथील प्रस्तावित मेगा प्रकल्पविरोधात करमळीवासीयांबरोबर विरोधी पक्षनेते युरी आलेमाव, आमदार वीरेश बोरकर यांनी पाटो-पणजी येथील नगरनियोजन खात्याच्या (टीसीपी) कार्यालयाबाहेर ठिय्या मांडला. अखेर मुख्‍यमंत्री सावंत यांनी ‘प्रकल्‍पास नोटीस पाठवून पुढील काळात काम थांबवण्‍याचा आदेश जारी करण्‍यात येईल’, असे रात्री जाहीर केले.

प्रकल्पाची मंजुरी रद्द करा, अशी मागणी आंदोलकांची राहिली. कार्यालय बंद होण्याच्या वेळी सायंकाळी उपस्थितांनी जोरदार घोषणाबाजी केल्याने परिसर दणाणून गेला. पोलिसांनी कार्यालय इमारतीचा ताबा घेतल्याने आंदोलनकर्त्यांना मुख्य नगरनियोनकारांना भेटण्यास दिले गेले नाही.

सायंकाळी उशिरा त्यांना भेटण्यास संधी दिली; पण प्रकल्प रद्दवर निर्णय झाला नाही. त्यामुळे आंदोलनकर्त्यांना कार्यालयाच्या प्रवेशद्वाराबाहेर ठिय्या मांडला होता. बोरकर यांन सांगितले की, करमळीत ८४ सदनिकांची इमारत उभारली जाणार आहे.

त्यात ४६ दुकानेही असतील. प्रकल्प उभारला गेल्यास करमळी गावात पाण्याची मोठी समस्या निर्माण होईल. दरम्यान, या प्रकल्पामुळे गावाची पारंपारिक जीवनशैली बाधित होईल. तसेच, या प्रकल्पाच्या कामामुळे वाहतुकीवर ताण, ध्वनी आणि प्रदूषण वाढण्याची शक्यता आहे, असाही दावा करण्यात आला.

कोणतेही उल्लंघन नाही : टीसीपी

करमळी मेगा प्रकल्प परिसराची नगर नियोजन खात्याच्या अधिकाऱ्यांनी तपासणी तथा पाहणी अहवाल सादर केला होता. या अहवालानुसार कोणतेही उल्लंघन झालेले नाही. सर्व नियम व अटींचे पालन झाल्याचे मुख्य नगरनियोजक वर्तिका डागर यांनी भेटण्यास गेलेल्या आमदार बोरकर यांना सांगितले.