Goa Taxi: गोव्यात टॅक्सी चालकांची मुजोरी दिवसेंदिवस वाढत चालली आहे. त्यातून प्रवासांना वेठीस धरण्याचे प्रकार घडत आहेत. आताही चक्क अमेरिकन प्रवाशांना वेठीस धरण्याचा प्रकार घडून आला आहे. त्यामुळे पर्यटकांमधून संताप व्यक्त केला जात आहे.

मुरगाव बंदरात नुकतेच पर्यटकांचे एक क्रुझ शिप दाखल झाले होते. त्यातून आलेल्या अमेरिकन पर्यटकांना बंदरातून शहरात नेण्यासाठी खासगी बसेसची सेवा घेतली जात असते. तशी सेवा या अमेरिकन पर्यटकांनी घेतली होती. तथापि, येथील मुजोर टॅक्सी चालकांनी या खासगी बसेस अडवून ठेवल्या आणि त्यांची टॅक्सी वापरण्याबाबत सक्ती केली.

क्रुझ ऑपरेटर्सच्या माहितीनुसार या अमेरिकन प्रवाशांना टॅक्सी चालकांकडून अक्षरशः हीन वागणूक देण्यात आली. या आंतरराष्ट्रीय प्रवाशांसमोर टॅक्सी चालकांनी त्यांच्या टॅक्सीतून प्रवास करण्याचा पर्याय ठेवला. अमेरिकन प्रवाशांनी वारंवार सांगुनही टॅक्सी चालक ऐकायला तयार नव्हते. टॅक्सी चालकांच्या अशा मुजोर वागण्याने या आंतरराष्ट्रीय प्रवाशांना नाहक मानसिक त्रास सोसावा लागला.

दरम्यान, टॅक्सी चालकांच्या या वागणुकीचा सर्व स्तरातून निषेध केला जात आहे. सरकारने अशा टॅक्सी चालकांवर कडक कारवाई करण्याची मागणी केली जात आहे. सरकारने असे प्रकार गांभीर्याने घेण्याची गरज आहे. कारण, याचा थेट संबंध गोव्याच्या प्रतिमेशी आहे. टॅक्सी चालकांच्या अशा वागण्याने देशासह आंतरराष्ट्रीय पातळीवर गोव्याच्या प्रतिमेला धक्का बसू शकतो. पर्यटन राजधानी म्हणून असलेल्या गोव्याची नकारात्मक ओळख यातून बनण्याची शक्यता असल्याने असले प्रकार वेळीच रोखले पाहिजेत.