Goa Police: दिड महिन्यापूर्वी व्हडलेभाट - ताळगाव येथील फ्लॅटमधील दागिने व रोख रक्कम मिळून सुमारे 3 लाखांचा ऐवज चोरून पसार झालेल्या दोघा चोरट्यांना पणजी पोलिसांनी हैदराबाद पोलिसांच्या मदतीने अटक केली. त्यांच्याकडून चोरलेले दागिने जप्त करण्यात पणजी पोलिसांना यश आले आहे.

संशयित रमेशकुमार सिंग (26) व जीतेंद्र कुमार ऊर्फ जित्तू मंगिलाल (26) हे सराईत चोरटे असून त्यांच्याविरुद्ध हैद्राबाद तसेच इतर राज्यांमध्येही चोरीचे गुन्हे नोंद आहेत. न्यायालयाने या दोघांनाही तीन दिवसांची पोलिस कोठडी दिली आहे.

व्हडलेभाट - ताळगाव येथील सतिशकुमार राजपुरोहित याच्याकडे संशयित रमेशकुमार सिंग हा कामाला होता व त्यांच्याकडेच राहायला होता. या संधीचा फायदा उठवून मालकाच्या फ्लॅटमधील रोख रुपये 1.60 लाख तसेच सोन्याचे दागिने घेऊन पसार झाला होता. त्यांनी जाताना मालकाचीच दुचाकी घेऊन गेला होता व तो परत आला नसल्याने सुरुवातीला मालकाने तो बेपत्ता असल्याची तक्रार दाखल केली होती.

गोव्यातून पसार होताना त्याने पणजी बसस्थानकाच्या आवारात दुचाकी ठेवलेली सापडली होती. त्याचबरोबर फ्लॅटमधील रोख रक्कम व दागिने गायब असल्याची तक्रार राजपुरोहित याने दिली होती. त्यानुसार दोघांना अटक झाली आहे.