वास्को: स्विगी नेटवर्क लिमिटेडच्या झुआरीनगर-सांकवाळ येथील लीड वेअर हाऊसमध्ये काही कर्मचाऱ्यांनी खोट्या नोंदी करून तब्बल ९३ लाख ३८ हजार रुपयांचा माल परस्पर हाऊसबाहेर नेल्याची घटना उघडकीस आली आहे. कंपनीची फसवणूक केल्याप्रकरणी वेअरहाऊसचे आतिष पाटील यांनी वेर्णा पोलिस स्थानकात तक्रार दाखल केली आहे.

याप्रकरणी वेर्णा पोलिसांनी संशयितांविरोधात गुन्हा नोंद केला आहे. पोलिसांनी दिलेल्या माहितीनुसार, सांकवाळ येथे स्विगी नेटवर्क्स लिमिटेडच्या वेअर हाऊसमधून २२ मे ते ६ जुलै २०२६ यादरम्यान बनावट कागदपत्रांद्वारे लाखो रुपयांचा माल परस्पर वेअर हाऊसबाहेर नेल्याचे स्पष्ट झाले.

याप्रकरणी वरिष्ठ कार्यकारी इन्व्हेंटरी अमित उठवाळे (ठाणे, महाराष्ट्र), पर्यवेक्षक ऋषभ राज (बिहार). इन्व्हेंटरी पर्यवेक्षक वैशाली पांडे (गुजरात), लोडर आफताब, साईट इनचार्ज आरिफ इसानी तसेच इतर अज्ञात व्यक्ती यांची संशयित म्हणून नावे नोंदविली आहेत.

लाखोंच्या सिगारेट्स, मोबाईल लंपास

संशयितांनी बनावट कागदपत्रे खरी असल्याचे भासवून वेअर हाऊसच्या सुरक्षा कर्मचाऱ्यांची दिशाभूल केली. या बनावट कागदपत्रांच्या आधारे ६७ लाख २९ हजार १७२ रुपयांच्या सिगारेट्स व २५ लाख ८ हजार ९३० रुपये किमतीचे मोबाईल असा मिळून ९३ लाख ३८ हजार १०२ रुपयांचा माल वेअर हाऊसबाहेर नेला. याप्रकरणी वेर्णा पोलिस स्थानकाचे निरीक्षक आनंद शिरोडकर पुढील तपास करीत आहेत.