साखळी: सुर्ल गावात साळगावकर खाण कंपनीच्या जुन्या खनिज डंपच्या हाताळणीसंदर्भात काही कागदपत्रे आणि परवानग्या मिळाल्या असल्या, तरी याबाबत अंतिम निर्णय अद्याप झालेला नाही. गावातील धूळ प्रदूषण तसेच इतर समस्यांवर योग्य तोडगा निघत नाही तोपर्यंत खाण सुरू होणार नाही, असे मुख्यमंत्री डॉ. प्रमोद सावंत यांनी स्पष्ट केले.

सुर्ल गावात ३५ वर्षांपूर्वी साठविलेल्या खनिज डंप हाताळणीला स्थानिकांनी विरोध दर्शविला आहे. या डंप हाताळणीमुळे पर्यावरण, शेती, जलस्रोत तसेच नागरिकांच्या आरोग्यावर परिणाम होण्याची भीती ग्रामस्थांनी व्यक्त केली आहे.या पार्श्वभूमीवर आज सुर्ल येथील साळगावकर गेस्ट हाऊसजवळ ग्रामस्थांनी एकत्र येऊन आंदोलन करण्याचे नियोजन केले होते. या पार्श्वभूमीवर मुख्यमंत्री सावंत यांनी ग्रामस्थांना आवाहन केले.

डंप हाताळणीस ग्रामस्थांचा विरोध

एक स्थानिक खाण कंपनी खाणमातीचा मोठा ढिगारा ३५ वर्षांनंतर परत उचलून नेणार असल्याची चाहूल लागल्याने पर्यावरणावर होणारे परिणाम नजरेसमोर ठेवून सुर्ल येथे डंप हाताळणीला विरोध करत स्थानिकांनी निदर्शने केली. या गंभीर विषयावर आता निर्णायक लढा उभारण्याचा निर्धार केला आहे. भायलीफाळ येथे झालेल्या बैठकीत या डंपिंगला ठाम विरोध करण्याचा निर्णय घेण्यात आला. गावाचे पर्यावरण, शेती, पाण्याचे स्रोत आणि भविष्यातील पिढ्यांचे हित जपण्यासाठी ग्रामस्थांनी एकजुटीने पुढे येण्याची गरज आहे. डंपिंगचा प्रश्न हा केवळ मातीच्या ढिगाऱ्यापुरता मर्यादित नसून गावाच्या पर्यावरणीय सुरक्षिततेशी आणि नैसर्गिक साधनसंपत्तीच्या संरक्षणाशी संबंधित असल्याची भावना ग्रामस्थांनी व्यक्त केली.