म्हापसा : सनबर्न संगीत महोत्सवात हजेरी लाण्यासाठी गोव्यात आलेल्या दिल्लीच्या तरुणाचा म्हापसा येथील खासगी रुग्णालयात मृत्यू झाला. मृत्यूचे कारण अद्याप स्पष्ट झालेले नाही. रविवारी रात्रीपर्यंत शवविच्छेदनाचा प्राथमिक अहवाल येणार असून त्यानंतरच मृत्यूचे कारण समजू शकेल असे सूत्रांनी सांगितले.

धारगळ येथे सनबर्न हा संगीत महोत्सव सुरू आहे. दिल्लीत राहणारा २५ वर्षांचा तरुण शनिवारी या महोत्सवात उपस्थित होता. प्रकृती खालावल्याने मध्यरात्री त्याला म्हापसा येथील व्हिजन रुग्णालयात दाखल करण्यात आले होते. रविवारी सकाळी त्याचा उपचारादरम्यान मृत्यू झाल्याची माहिती उत्तर गोव्याचे पोलीस अधीक्षक अक्षत कौशल यांनी ‘गोमन्तक टीव्ही’ला दिली. तरुणाच्या पालकांना या घटनेची माहिती देण्यात आली आहे.

धारगळ येथे सुरू असलेला सनबर्न महोत्सव हा सातत्याने वादाच्या भोवऱ्यात असतो. 2007 पासून हा महोत्सव गोव्यात होत आहे.

जगातील ११ व्या क्रमांकाचा सर्वात मोठा संगीत महोत्सव अशी त्याची ओळख आहे. या इलेक्ट्रॉनिक डान्स म्युझिक (EDM) महोत्सवाचा संबंध अमली पदार्थांशीही जोडला जातो. यंदा देखील महोत्सव कुठे होणार यावरून वाद झाला होता.

2019 मध्ये सनबर्न महोत्सवाला गालबोट लागले होते. महोत्सवात तीन पर्यटकांचा मृत्यू झाला होता. यात आंध्र प्रदेशमधून आलेल्या दोन जणांचा रांगेत थांबले असताना मृत्यू झाला होता. तर बेंगळुरूतील 26 वर्षांच्या तरुणाची महोत्सव सुरू असताना प्रकृती खालावली आणि तो कोसळला. त्याचाही रुग्णालयात उपचारादरम्यान मृत्यू झाला होता.

दिल्लीतील तो तरुण कोण?

करण कश्यप नावाचा हा तरुण दिल्लीतील रहिवासी होता आणि काही मित्रांसोबाबत तो सनबर्नसाठी गोव्यात आला होता. संगीत महोत्सवाच्यावेळी अचानक बेशुद्ध झाल्याने त्याला व्हिजन रुग्णालयात हलवण्यात आले होते.