काळाच्या ओघात आठवणी धूसर होत जातात. तरी कवडसे बनून त्या मनात हो - ना करत लकाकत असतात आणि त्यांच्या त्या तशा लकाकण्यात एक तऱ्हेची मौज असते. त्या चिमटीत पकडून न्याहाळता आल्या असत्या तर... ‘सुनापरान्त गोवा सेंटर ऑफ आर्टस्’ (Sunaparanta Goa Centre for the Arts) या आल्तिनो, पणजी (Pnajim) येथील संस्थेने ‘इन गोवा : अ टाईम दॅट वॉज’ (In Goa : A Time That Was) हे छायाचित्राचे प्रदर्शन आयोजित करून गोव्याच्या (Goa) भूतकालीन वैशिष्ट्यांना न्याहाळण्याची संधी कला रसिकांना दिली आहे.

गोमंतकीय पार्श्वभूमी असलेली ही छायाचित्रे त्या त्या काळाचा महत्वाचा दस्तावेज तर आहेतच परंतू ती पाहता-पाहता त्यातून कहाण्या उलगडायला सुरुवात होते. नाट्य, प्रणय, वेदना, आनंद या सारख्या भावनांत वैयक्तिकरित्या आपण गुंतत जातो. “इन गोवा: अ टाईम दॅट वॉज” या छायाचित्र प्रदर्शनात उदयोन्मुख कलाकार आणि फिल्ममेकर इप्शीता मैत्रा, फोटोग्राफर आणि लेखक वास्वो वास्वो आणि इतिहास संशोधक आणि स्थापत्यकार विश्‍वेश काकोडकर हे गोमंतकीय जीवनातल्या सामाजिक आणि सांस्कृतिक क्षणांचे भूतकालीन अवशेष रसिकांसमोर सादर करणार आहेत. हे तिघेही त्यांच्या कहााण्यातून आपल्याला वर्तमानातून भूतकाळात नेत, काळ आणि वेळेच्या अनाकारात दर्शकांच्या बांधीलकीला, कल्पनाशक्तीला आणि रसास्वादांना आवाहन करतात.

आपल्या “लॉस्ट ॲड्रेसेस ॲन्ड वन्स वॉज होम” या दोन भागांच्या संग्रहातून इप्शीता मैत्रा आपल्या वांशिक, वडिलोपार्जित, भौगोलिक सभोवतालाचं दर्शन फोटोग्राफिक पध्दती वापरून घडवतात. ज्या आज आपल्याला फार अभावानेच दिसतात. आपल्या गोव्याच्या वास्तव्यात, या नंदनवनाच्या शोधात आपल्या आयुष्याची काही वर्षे घालवलेले वास्वो वास्वो जुन्या पध्दतीने प्रक्रिया केलेल्या फोटोग्राफ्स मधून ‘रेमेम्बरन्स’ आणि ‘लॉन्गटायमर्स’ या दोन भागात त्या काळच्या ‘हिप्पी’ आणि ‘स्थानिक’ या दोन भिन्न पण सुंदर तऱ्हेने एकमेकांशी जुळवून घेतलेल्या जगाचं दर्शन घडवतात.