धारबांदोडा तालुक्यातील दयानंदनगर येथील संजीवनी साखर कारखान्यात काही वर्षांपासून बंद अवस्थेत असलेले ऊस तोडणी यंत्र पुन्हा सुरु करण्यात आले असल्याचे माहिती कारखान्याचे प्रशासक सतेज कामत यांनी दिलीय. त्या मशीनची आवश्यक ती दुरुस्ती केली असून सर्व्हिसिंगमध्ये बॅटरी बदलण्यात आली असल्याची माहिती कामात यांनी दिलीय.

हा कारखाना काही वर्ष ऊस तोडणीसाठी शेजारील राज्यांतील मशीन वापरत होता. त्यामुळे वेळेची बचत करण्यासाठी संजीवनी साखर कारखान्याने हे यंत्र 2010 मध्ये विकत घेतले होते. मात्र त्यानंतर कित्येक वर्ष बंद अवस्थेत असल्याने या मशीनचा लिलाव करण्याची प्रक्रिया मार्च 2014 मध्ये कारखान्याने सुरू केली.

त्यावेळी 89 लाख रुपयांच्या आधारभूत किमतीला कंपनीने हे मशीन लिलावात आणले असून ते कोणीही घेतले नव्हते. त्यानंतर आता ते कार्यान्वित झाल्यानंतर, मशीन सुरळीतपणे काम करत असून या मशीनद्वारा कारखान्याच्या शेतात लागवड केलेल्या सुमारे 300 मेट्रिक टन ऊसाची काढणी केली जात असल्याचे कामत यांनी सांगितले आहे.