पणजी: भाजपच्या मंत्रिमंडळ स्थापनेबाबत उत्सुकता वाढली आहे. सूत्रांकडून मिळालेल्या माहितीनुसार, आठ माजी मंत्र्यांची नावे निश्चित झाली आहेत. यात माविन गुदिन्हो, विश्वजीत राणे, रोहन खंवटे, बाबूश मोन्सेरात, नीलेश काब्राल, रमेश तवडकर, गोविंद गावडे, नीळकंठ हळर्णकर यांचा समावेश आहे. शिवाय अपक्ष आमदार आलेक्स रेजिनाल्ड यांनाही मंत्रिमंडळात स्थान मिळणार आहे. दुसरीकडे भाजप कार्यकर्ते, आमदार आणि बहुजन महासंघाचा विरोध असूनही मगोपचे आमदार सुदिन ढवळीकर यांना मंत्रिमंडळात स्थान मिळणार आहे. मात्र, भंडारी समाजाचे नेतृत्व करणारे रवी नाईक आणि सुभाष शिरोडकर यांच्यापैकी एकालाच मंत्रिमंडळात स्थान द्यावे का, यावर अद्याप चर्चा सुरू आहे.

महिलांपैकी कोण?

मंत्रिमंडळात एक तरी महिला असावी, असे भाजपमधील काही नेत्यांचे म्हणणे आहे. मात्र, जेनिफर मोन्सेरात, की डॉ. दिव्या राणे यांच्या नावावर अद्याप शिक्कामोर्तब होऊ शकलेले नाही. कारण विश्वजीत आणि बाबूश मोन्सेरात मंत्रिमंडळात असणार आहेत. या दोघींपैकी कुणाची वर्णी लागणार, याची उत्सुकता लागली आहे.

पंतप्रधानांसह दहा राज्यांचे मुख्यमंत्री येणार

सोमवारी डॉ. श्यामाप्रसाद मुखर्जी स्टेडियमवर होणाऱ्या शपथविधी सोहळ्याला पंतप्रधान नरेंद्र मोदी, गृहमंत्री अमित शहा, केंद्रीय भूपृष्ठ वाहतूक मंत्री नितीन गडकरी, भाजपचे राष्ट्रीय अध्यक्ष जे. पी. नड्डा यांच्यासमवेत दहा राज्यांचे मुख्यमंत्री उपस्थित राहणार आहेत. यात मध्य प्रदेशचे मुख्यमंत्री शिवराज चौहान, हिमाचलचे जयराम ठाकूर, आसामचे हेमंत बिश्वा, कर्नाटकचे बसवराज बोम्मई, गुजरातचे भूपेंद्र पटेल, नागालँडचे नाइपू रिओ, उत्तराखंडचे पुष्करसिंग धामी, मणिपूरचे एन. बीरेन सिंग आणि उत्तर प्रदेशचे मुख्यमंत्री योगी आदित्यनाथ यांचा समावेश आहे.