Fire In Goa झरीवाडा पडोसे पर्ये या भागात गुरुवारी सकाळी लागलेल्या आगीमुळे स्थानिक लोक बरेच धास्तावले. घरांपर्यंत पसरत येणारी आग नियंत्रणात आणण्यासाठी स्थानिकांना हातात बादल्या घेऊन धावपळ करावी लागली.

अग्निशामक दलाची गाडी घटनास्थळी दाखल होऊनही आवश्यक ठिकाणी पोहोचू न शकल्याने स्थानिकांचीही तारांबळ उडाली. अग्निशामक दलाच्या जवानांनीही आग आटोक्यात आणण्यात योगदान दिले.

गुरूवारी सकाळी झरीवाडा येथील घरांच्या मागे असलेल्या डोंगर भागात आग लागली. सदर आग अचानक भडकल्याने स्थानिकांच्या मनात एकच धडकी भरली.

लागलीच स्थानिक पंचसदस्य लक्ष्मीकांत शिरोडकर यांनी डिचोली अग्निशामक दलाला संपर्क साधला. परंतु या भागात जाण्यासाठी योग्य वाट रस्ता नसल्याने दलाची गाडी पुढे जाऊ शकली नाही.

अखेर आग नियंत्रणात !

अग्निशामक दलाच्या जवानांनी शक्य होईपर्यंत पाण्याची फवारणी केली. आग आटोक्यात आणण्याचा आटोकाट प्रयत्न केला.

परंतु आग घरांच्या जवळ पोहोचू लागल्यानंतर स्थानिकांनी घरातील बादली, कळशी, तांब्या जे मिळेल ते भरून आणत आग घरांपर्यंत येण्यापासून रोखण्याची धडपड केली.

यात अग्निशामक दलाच्या जवानांनी तसेच पंचसदस्य लक्ष्मीकांत शिरोडकर यांनीही त्यांना मदत केली. अखेर सदर आग नियंत्रणात आणण्यात त्यांना यश आले.