सासष्टी: नावेली येथील एडविन कुएलो (25) हा तरुण अटकेत असताना त्याच्यावर 23 नोव्हेंबर रोजी मध्यरात्री प्राणघातक हल्ला केल्याप्रकरणी कुएलो याने पोलिस उपनिरीक्षक स्टेनली गोम्स यांच्याविरोधात मडगाव पोलीस स्थानकात तक्रार दाखल केली आहे. मात्र, पोलिसांनी अद्याप गुन्हा नोंद न केल्याने नावेलीतील स्थानिकांनी गुरुवारी पोलीस स्थानकात येऊन गुन्हा नोंद करण्याची मागणी केली. या हल्ल्यात कुएलो याच्या कानातून रक्तस्त्राव झाल्याचेही तक्रारीत नमूद केले आहे.

पोलिसांनीच हल्ला करणे योग्य नसून संबंधित अधिकाऱ्यावर कारवाई होणे आवश्यक आहे, असे ॲड. सियोला वाझ यांनी सांगितले. त्यांनी या घटनेचा निषेध केला आहे. वैद्यकीय अहवालानुसार कुएलो याला गंभीर दुखापत झाली असून अशा गुन्ह्याखाली 7 वर्षांच्या तुरुंगवासाची शिक्षा आहे. पोलीस मनाला येईल तसे वागू शकत नाहीत. कायदा सर्वांसाठी समान आहे. पोलिस स्टेशन लोकांसाठी सुरक्षित आहेत, असा संदेश द्यायला हवा, असे ॲड. वाझ यांनी स्पष्ट केले.