Mahadayi River: म्हादई नदीसंदर्भात गोवा सरकार आणि शैक्षणिक संस्था यांच्याद्वारे अधिक अभ्यास करणे गरजेचे असून जेणेकरून धोरण तयार करण्यात सहकार्य होईल, असेल प्रतिपादन ॲडव्होकेट जनरल देविदास पांगम यांनी केले.

ते गोवा विद्यापीठाच्या ‘मल्टी डिसीप्लिनरी क्लस्टर’तर्फे ‘म्हादई-अमल्टी डिसीप्लिनरी एक्सप्लोरेशन’ (म्हादई बहुउद्देशीय अन्वेषण) या शीर्षकांतर्गत गोवा विद्यापीठाच्या समाजशास्त्र विभागाच्या फॅकल्टी ब्लॉक ‘बी’ मधील सेमिनार हॉलमध्ये आयोजित कार्यशाळेच्या उद्‍घाटनसमयी बोलत होते. जलसंपदा खात्याचे माजी मुख्य अभियंता संदीप नाडकर्णी, प्रा. राहुल त्रिपाठी, प्रा. गणेश सोमयाजी, डॉ. प्रकाश पर्येकर उपस्थित होते.

ॲड. पांगम म्हणाले, शैक्षणिक समुदाय म्हादई नदीच्या जलविज्ञान, पर्यावरण विज्ञान आणि जीवशास्त्रातील तज्ञांना आणून अभ्यासाच्या अनुषंगाने मदत करू शकतो. जलसंपदा खात्याचे माजी मुख्य अभियंता संदीप नाडकर्णी यांनी म्हादई वादाचा उगम आणि 2018 पासूनच्या म्हादई लवादाचा आढावा घेतला. त्यांनी म्हादईवर एक विश्लेषण देखील सादर केले. गोव्याच्या दृष्टीकोनातून या समस्येवर प्रकाश टाकला.

त्यांनी संभाव्य प्रभाव पडताळून पाहण्यासाठी वैज्ञानिक आधारावर सखोल अभ्यासाची गरज आहे, असल्याचे सांगितले. या कार्यशाळेत 20 सादरीकरणे होतील. भूगर्भशास्त्र, वनस्पतीशास्त्र, अर्थशास्त्र, इतिहास आणि राजशास्त्र तसेच सांस्कृतिक अभ्यास अशा विविध अंगांनी प्रज्ञावंतांनी आपली मते मांडली. म्हादई नदीसाठी चाललेल्या लढ्यातील सक्रिय कार्यकर्त्यांनी देखील या कार्यशाळेत आपली मते मांडली.