Goa Educational Report

पणजी: राज्यात माध्यमिक पातळीवर विद्यार्थी गळतीचे प्रमाण ८.०७ टक्के आहे. त्यात १० टक्के मुलगे तर ५ टक्के मुली असल्याची माहिती समोर आली आहे. केंद्र सरकारच्या शालेय शिक्षण आणि साक्षरता विभागाने प्रसिद्ध केलेल्या युनिफाईड डिस्ट्रिक्ट इन्फर्मेशन सिस्टम फॉर एज्युकेशन प्लस २०२३-२४ अहवालानुसार, गोव्यातील शैक्षणिक स्थितीबाबत काही महत्त्वाच्या बाबी पुढे आल्या आहेत.

सदर अहवालानुसार, विद्यार्थी गळती ही प्राथमिक स्तरावर ०.८ टक्के तर उच्च प्राथमिक स्तरावर १.१ टक्के आहे. राज्यातील १ हजार ४८७ शाळांपैकी २३८ शाळांमध्ये फक्त एकच शिक्षक आहे, ज्यात ३ हजार १४२ विद्यार्थी शिकत आहेत. ही संख्या २०२२-२३ मधील २३७ शाळांपेक्षा एकने वाढली आहे.

शाळांमधील विद्यार्थी-शिक्षक गुणोत्तर प्राथमिक स्तरावर २५:१ (राष्ट्रीय सरासरी २८:१) उच्च प्राथमिक स्तरावर १४:१ (राष्ट्रीय सरासरी २४:१), माध्यमिक स्तरावर ८:१ (राष्ट्रीय सरासरी १९:१), उच्च माध्यमिक स्तरावर १६:१(राष्ट्रीय सरासरी २७:१) आहे.

राज्यातील ७८९ सरकारी शाळांपैकी फक्त १५८ शाळांमध्ये (२० टक्के) शैक्षणिक उद्दिष्टांसाठी कार्यरत संगणक सुविधा आहेत, तर सरकारी अनुदानित शाळांमध्ये हे प्रमाण ९४.६ टक्के आणि खासगी अनुदानित शाळांमध्ये ९२.९ टक्के आहे. स्मार्ट वर्ग फक्त ८.२ सरकारी शाळांमध्ये उपलब्ध आहेत, जे राष्ट्रीय सरासरी २१ टक्क्यांपेक्षा कमी आहे. सरकारी अनुदानित शाळांमध्ये हे प्रमाण ४३.४ टक्के आणि खासगी अनुदानित शाळांमध्ये ४८ टक्के आहे. दरम्‍यान, सदर अहवालानुसार, विशेषतः तांत्रिक सुविधा आणि विशेष गरजा असलेल्या विद्यार्थ्यांसाठीच्या सुविधांमध्ये सुधारणा आवश्यक आहे.