फातोर्डा: किनाऱ्यांवरील बेकायदा व्यवसायांना आळा घालण्‍यासाठी विधानसभा अधिवेशनात आपण विधेयक मांडणार आहे, असे आमदार व्हेंझी व्‍हिएगस यांनी सांगितले. कोलवा किनाऱ्याची पाहणी केल्‍यानंतर ते बोलत होते.

किनाऱ्यावर दारू पिण्यासाठी बंदी असूनही पर्यटक दारूच्या बाटल्या घेऊन येतात. फेरीवाल्यांच्या संचारास बंदी असूनही त्यांचा वावर वाढतोय. तसेच अन्य गैरकृत्‍यांनाही ऊत आला आहे. आपण स्थानिक पंचायतीला विश्वासात घेऊन यावर तोडगा काढणार असल्‍याचे व्‍हिएगस यांनी कोलवा किनाऱ्याची पाहणी केल्‍यानंतर सांगितले.पोलिस व पर्यटन खात्‍याने आपली जबाबदारी पार पाडायला हवी. किनारी भागांत चालणाऱ्या गैरकारभाराला आळा घालण्यासाठी सर्वांचे सहकार्य गरजेचे आहे, असेही व्‍हिएगस म्‍हणाले.

कॉन्‍स्‍टेबल करतो खंडणी वसूल!

आमदार व्‍हिएगस यांनी पोलिसांच्‍या कारभारावरही ताशेरे ओढले. ते म्‍हणाले की, कोलवा पोलिस स्‍थानकात जो कॉन्‍स्‍टेबल आहे, तो कधीही गणवेश घालत नाही. त्‍याला काही वरिष्‍ठ अधिकारीही दचकून असतात. रस्त्यावरील विक्रेत्यांपासून ते पंचतारांकित हॉटेल्सपर्यंत हा कॉन्‍स्‍टेबल खंडणी वसूल करतो, असा सनसनाटी आरोपही त्‍यांनी केला.