मडगाव: वेर्णा औद्योगिक वसाहतीबाहेर पुन्हा मोठ्या प्रमाणात कचरा टाकून नंतर तो जाळण्याचे प्रकार होऊ लागल्याने केळशीमधील रहिवासी आक्रमक बनले आहेत. कचरा जाळणाऱ्यांनी त्वरित हे प्रकार बंद न केल्यास रस्त्यावर उतरू,असा इशारा ग्रामस्थांनी दिला आहे.स्थानिक पंचायत व गोवा (Goa) प्रदूषण नियंत्रण मंडळाकडेही रीतसर तक्रारी केल्या, पण त्यांची दखल घेतली न गेल्याने ग्रामस्थ संतापले आहेत.

ग्रामस्थ गुरुवारी कचरा जाळण्याच्या जागेजवळ एकत्र आले व त्यांनी संबंधित सरकारी यंत्रणा व स्थानिक पंचायत या प्रकरणी वारंवार तक्रारी करूनही कारवाई का करत नाही, असा सवाल केला. ग्रामस्थांच्या म्हणण्याप्रमाणे कोमुनिदादच्या जागेत अज्ञातांकडून सर्व प्रकारचा कचरा आणून टाकला जातो. नंतर तो रात्री,अपरात्री पेटविला जातो. त्यात प्लास्टिकच्या वस्तू, एसीचे इन्सुलेटर,सिरॅमिक्स, बेसीन , कमोड यांचाही समावेश असतो.

कचऱ्यातील (Garbage) या वस्तूंना आग लावल्याने प्रदूषण तसेच विषारी वायू तयार होऊन तो वातावरणात पसरत असतो. त्याचा सर्वाधिक त्रास जवळच्या भागातील रहिवाशी असलेल्या ज्येष्ठ नागरिक (Senior Citizens) व लहान मुलांना होतो.