पणजी: पणजीतील सांतिनेज परिसरातील गामा पिंटो मार्गावरील पॅलेसियो दी गोवा हॉटेल परिसरातील काही खासगी इमारती जीर्ण झाल्या आहेत. या इमारतींचा रस्त्याच्या बाजूचा भाग धोकादायक दिसत आहे.

पादचाऱ्यांना या इमारतींच्या खालून जाताना जीव धोक्यात घालून ये-जा करावी लागत आहे. महानगरपालिकेला याची कल्पना असली तरी त्याविषयी कडक पावले उचलली जात नसल्याचे येथील नागरिक सांगतात.

रस्त्याच्या बाजूचे सज्जे आणि गॅलरीचे भाग जीर्ण झालेले आहेत. या इमारतींचा कालावधीही संपला आहे. काही ठिकाणी इमारतीच्या बांधकामाने जागा सोडली आहे, ते भाग कधीही कोसळू शकतात, अशी स्थिती आहे.

एका इमारतीचे प्लास्टरचे तुकडे निसटून खाली पडत आहेत. इमारतीच्या खालील एका दुकान चालकाने इमारतीचा तो धोकादायक कोपऱ्यावर प्लास्टिक जाळीदार तावदान लावले असले तरी तो तात्पुरता उपाय आहे. या इमारती रहिवाशांसाठी धोकादायक बनल्या आहेत, परंतु तेथील रहिवाशांचे स्थलांतर करण्याविषयी संबंधित सोसायटीने तातडीने पावले उचलणे गरजेचे आहे.

अनेक वर्षांपासून येथील जीर्ण इमारतींचा स्थलांतराचा विषय भिजत पडलेला आहे. खरे तर सोसायटीने आणि लोकप्रतिनिधींनी हा विषय तातडीने सोडविला पाहिजे, अघटीत घटना घडल्यानंतर धावाधाव करणे योग्य नाही, अशी प्रतिक्रिया पणजीतील नागरिक व्यक्त करीत आहेत.