पणजी: आपल्या आयुष्यात येणाऱ्या टीका, वाद आव्हानांना सामोरे जात अंगावर येणाऱ्या प्रतिस्पर्ध्याला क्रीडापटू शिंगावर घेतो त्यावेळीच तो खरा चॅम्पियन ठरतो, असे प्रतिपादन क्रीडामंत्री गोविंद गावडे यांनी केले. कला अकादमी येथे क्रीडा प्राधिकरणाने राष्ट्रीय तसेच आंतरराष्ट्रीय स्तरावर राज्यातील उत्कृष्ट कामगिरी करणाऱ्या क्रीडापटूंसाठी आयोजित करण्यात आलेल्या बक्षीस वितरण कार्यक्रमात ते बोलत होते.

गावडे पुढे म्हणाले, की ३७ व्या स्पर्धेत तुम्ही पदके मिळवली म्हणजे आता कार्य संपले असे नाही, तर आता खऱ्या अर्थाने क्रीडा जीवन प्रवासाला सुरवात झाली आहे याची जाणीव ठेवून वाटचाल करणे गरजेचे आहे. अनेक खेळाडू ज्यावेळी स्पर्धा असतात त्यावेळीच सराव करतात, परंतु स्पर्धा असो वा नसो सराव सुरू ठेवणे गरजेचे आहे. ज्यावेळी क्रीडापटू आपले कलागुण दाखवतील त्यावेळीच सरकार मदत करू शकते.

जर आपण आपल्याला सिद्ध करत नाही, तोपर्यंत मान्यता मिळत नाही. आपल्यावर होणाऱ्या टीका, वादांवर लक्ष न देता आपल्याला जे यश प्राप्त करायचे आहे त्यावर लक्ष ठेवा. यासाठी मनावर ताबा ठेवत आपण पुढे जात राहणे गरजेचे आहे. ज्यावेळी आपल्याला यश मिळणार असे जाणवते, त्यावेळी अनेकजण पाय ओढतात, परंतु यश प्राप्तीनंतर तेच पहिल्यांदा नतमस्तक होतात हे ध्यानात ठेवून कार्य करा.

‘पैशांसाठी नव्हे, गोवा आणि देशासाठी खेळा’

राज्यातील आंतरराष्ट्रीय तसेच राष्ट्रीय क्रीडा स्पर्धांमध्ये सहभागी झालेल्या २८७ खेळाडूंना आर्थिक बक्षिसांचे वाटप करण्यात आले. एकूण २ कोटी ६८ लाख रुपयांची बक्षिसे सरकारकडून देण्यात आली आहेत. या क्रीडा प्रकारातील खेळांडूनाही प्रोत्साहन देणे हे कर्तव्य समजून त्यांनी ५० टक्के आर्थिक मदतीची बक्षिसे देण्यात आली आहेत. खेळ हा पैशांसाठी खेळण्यासाठी नसून गोव्याचे आणि आपल्या भारत देशाचे नाव उज्ज्वल करण्यासाठी खेळणे गरजेचे असल्याचे मंत्री गावडे यांनी सांगितले.