पणजी: राज्याच्या अंतर्गत भागातील पर्यटनाच्या वृद्धीसाठी सरकार कटिबद्ध असल्याच्या घोषणा करते मात्र, कृती होत नाही, अशा प्रतिक्रिया पर्यटन क्षेत्रातील घटकांतून उमटत आहेत. दरम्यान, धार्मिक पर्यटनाला प्रोत्साहन देण्यासाठी पर्यटन खात्याने ‘एकादश तीर्थ सर्किट’ उपक्रम सुरू केला आहे. या योजनेत राज्यातील ११ पवित्र मंदिरे समाविष्ट करण्यात आली असून, पर्यटकांना अध्यात्मिक अनुभव देण्यासाठी हे महत्त्वाचे पाऊल उचलले गेले आहे.

या सर्किटमधील मंदिरांच्या व्यवस्थापन समित्यांसोबत पर्यटन खात्याने सक्रिय संवाद साधला आहे. यामध्ये मंदिरे (Temple) आणि परिसराचा पायाभूत विकास, सांस्कृतिक वारशाचे संवर्धन, तसेच पर्यटकांसाठी मूलभूत सुविधा वाढवण्याचे प्रयत्न सुरू आहेत. ‘एकादश तीर्थ सर्किट’ योजना देश-विदेशातील पर्यटकांना आकर्षित करण्यासाठी विविध व्यापार मेळावे आणि प्रचार कार्यक्रमांत सादर करण्यात आली आहे. या योजनेमुळे धार्मिक पर्यटनाला चालना मिळेल,असे विभागाने स्पष्ट केले आहे.

‘समुद्रापलिकडचा गोवा’

याशिवाय, सरकारने (Government) ‘समुद्रापलीकडे गोवा’ ही मोहीम सुरू केली आहे. या मोहिमेंतर्गत अंतर्भागीय पर्यटन, पर्यावरणीय पर्यटन सर्किट्स, तसेच स्थानिक समुदायांशी निगडित पर्यटन उपक्रमांना प्रोत्साहन दिले जात आहे. या उपक्रमांमुळे गोव्याच्या पर्यटन क्षेत्रात नवे आयाम उभारले जात असून, राज्याच्या अंतर्भागातील नैसर्गिक सौंदर्य आणि सांस्कृतिक वारसा अधिक चांगल्या पद्धतीने पर्यटकांसमोर आणण्याचा प्रयत्न केला जात आहे.