Crime News : पणजी, राज्यातील जमीन हडप प्रकरणातील मुख्य सूत्रधार मोहम्मद सुहेल ऊर्फ मायकल फर्नांडिस (४७ वर्षे) याच्यासह रॉयसन डिसोझा आणि स्टिव्हन डिसोझा या तिघांना तीन वेगवेगळ्या गुन्‍ह्यांमध्ये विशेष तपास पथकाने (एसआयटी) अटक केली.

त्यांना उद्या (शुक्रवारी) न्यायालयात हजर करून तपासासाठी पोलिस कोठडी घेण्यात येणार आहे.

या संशयितांविरुद्ध जमीन हडप प्रकरणाच्या ‘एसआयटी’कडे अनेक तक्रारी दाखल झाल्या होत्या, अशी माहिती या पथकाच्या अधिकाऱ्यांनी दिली. म्हापसा पोलिस स्थानकात नोंद असलेल्या जमीन हडप प्रकरणात संशयित मोहम्मद सुहेल याला अटक करण्यात आली आहे.

संशयित रॉयसन डिसोझा आणि स्टिव्हन डिसोझा यांना क्राईम ब्रँच पोलिस स्थानकात नोंद असलेल्या प्रकरणात अटक झाली आहे. मुख्य सूत्रधार मोहम्मद सुहेल याच्याविरुद्ध आतापर्यंत सहापेक्षा अधिक गुन्हे दाखल आहेत. या तिघांविरुद्ध फसवणूक, कटकारस्थान या आरोपांखाली गुन्हे दाखल करण्यात आले आहेत.

जमीनमालकांना मिळणार ताबा

राज्यातील जमीन हडप प्रकरणाची सरकारने गंभीर दखल घेतली आहे. एसआयटीने याप्रकरणी केलेल्या तपासकामाचे निरीक्षण एकसदस्यीय आयोगाचे निवृत्त न्यायमूर्ती जाधव यांनी करून त्याचा अहवाल राज्य सरकारला सादर केला आहे.

त्यानुसार या जमिनी तक्रार केलेल्या मूळ मालकांना परत करण्यासाठीची प्रक्रिया सुरू होईल. त्यासाठी जमीनमालकाला त्या जमिनीचा अधिकृत दस्तावेज सरकार दरबारी दावा करताना सादर करावा लागणार आहे.