सासष्टी: दक्षिण गोव्याचे खासदार कॅप्टन विरियातो फर्नांडिस यांनी वेळसाव येथे रेल्वे दुपदरीकरणाच्या नावाखाली खासगी मालमत्ता बळजबरीने बळकावल्याचे प्रकरण लोकसभेत उपस्थित केले.

नियम ३७७ चा आधार घेऊन खासदार विरियातो फर्नांडिस यांनी लोकसभेत रेल विकास निगम लिमिटेडच्या कंत्राटदाराकडून स्थानिक नागरिकांच्या मालमत्तेचे अतिक्रमण होत असल्याचा मुद्दा मांडला.

सरकारी अधिकारी या बेकायदेशीर कृत्याला उघडपणे पाठिंबा देत असल्याचेही त्यांनी यावेळी लोकसभेत हा मुद्दा मांडताना नमूद केले.

वेळसांव येथील ज्यांच्या खासगी मालमत्तेचे अतिक्रमण केले आहे, त्या नागरिकांना सध्या कोणत्या समस्यांना तोंड द्यावे लागते, त्यावर खासदार फर्नांडिस यांनी प्रकाश टाकला. जे कोण या कृत्यात सामिल आहेत, त्या सर्व रेल विकास निगम लिमिटेडच्या तसेच सरकारी अधिकाऱ्यांवर कठोर कारवाई करण्याची मागणी कॅप्टन विरियातो फर्नांडिस यांनी लोकसभेत केली आहे.

दरम्यान, वेळसांवसीयांचा प्रश्न लोकसभेत उपस्थित केल्याबद्दल वेळसावच्या ग्रामस्थांनी खासदार विरियातो फर्नांडिस यांचे आभार मानले.