Goa Politics:

उत्तर गोव्याचे खासदार श्रीपाद नाईक हे राज्यमंत्री असल्याने ते प्रश्न विचारू शकत नव्हते. दक्षिण गोव्याचे खासदार फ्रांसिस सार्दिन यांनी पाच वर्षात केवळ ८६ प्रश्न विचारले. महाराष्ट्रातील ४९ खासदारांनी सर्वांधिक म्हणजे ३१५ प्रश्न विचारले तर सर्वात कमी प्रश्न मणिपुरच्या दोन खासदारांनी (२५ प्रश्न) विचारले.

असोसिएटेड डेमोक्रेटीक रिफॉर्मस् या संस्थेने केलेल्या विश्लेषणानुसार गोव्यातील खासदारांची कामगिरी उघड झाली आहे.

गोव्यातील जनतेने निवडून दिलेले दोन खासदार संसद अधिवेशनाच्या सर्व दिवसांत संसदेत उपस्थित नव्हते. सरासरी १२९ दिवस संसदेत उपस्थित होते.

छत्तीसगडमधील ११ खासदार आणि गुजरातचे २६ खासदार सर्वाधिक दिवस म्हणजे २७३ दिवसांपैकी २१६ दिवस संसदेत उपस्थित होते. सर्वात कमी उपस्थिती ही अरुणाचल प्रदेशातील २ खासदारांची आहे. ते २७३ पैकी केवळ १२७ दिवस कामकाजात सहभागी झाले होते.

१७ व्या लोकसभेत कॉंग्रेसच्या ५४ खासदारांनी मिळून केवळ १९६ तर राष्ट्रवादी कॉंग्रेसच्या ५ खासदारांनी ४१० प्रश्न विचारले होते. सर्वात कमी प्रश्न अपना दलाच्या दोन खासदारांनी (केवळ ५ प्रश्न) विचारले. संसदेतील ५०५ खासदारांनी मिळून ९२ हजार २७१ प्रश्न विचारले त्यात सर्वाधिक प्रश्न विचारणाऱ्या दहा खासदारांत दक्षिण गोव्याचे खासदार फ्रान्सिस सार्दिन यांचा समावेश नाही.पहिल्या १० खासदारांत शेजारील महाराष्ट्रातील ६ खासदारांचा समावेश आहे.

सार्दिन यांची कामगिरी

२७३ पैकी २५५ दिवस (९३.४ टक्के) उपस्थिती. ८६ प्रश्न विचारले. संसदेत खासदारांनी सरासरी १६५ प्रश्न विचारले याचा अर्थ सार्दिन यांनी सरासरी गाठलेली नव्हती. संसदेत खासदारांची उपस्थिती सरासरी १८९ दिवस होती ती सार्दिन यांनी ओलांडली होती.