Mother Lodges Complaint Against Son for Theft in Mapusa

म्हापसा: मौजमजेसाठी आपल्याच आईचे ४ लाख रुपये चोरल्याचा धक्कादायक प्रकार म्हापसा शहरात उघडकीस आला. याप्रकरणी फिर्यादी आई प्रिया पुंडलिक वायंगणकर (रा. खोर्ली) यांच्या तक्रारीच्या आधारे म्हापसा पोलिसांनी संशयित प्रियेश पुंडलिक वायंगणकर (३९) याला अटक केली. संशयित व फिर्यादी एकाच घरात राहतात.

पोलिसांनी दिलेल्‍या माहितीनुसार, ही चोरीची घटना दि. २५ ऑक्‍टोबर रोजी दुपारी घडली होती. आईने घरातील कपाटामध्ये ४ लाख रुपये रोख ठेवले होते. हे पैसे आपल्या मौजमजेसाठी हवे असल्याने मुलाने त्‍या पैशांवर डल्ला मारला.

हा प्रकार फिर्यादीच्या लक्षात येताच, तिने म्हापसा पोलिसांत तक्रार दिली. त्यानुसार, या चोरीमागे संशयित मुलगाच असल्याचे पोलिस तपासात समोर आले. त्यानुसार पोलिसांनी संशयित प्रियेशला अटक केली. पोलिसांनी संशयितांकडून ७० हजार रुपये हस्तगत केले आहेत.

म्हापसा न्यायालयाने संशयित मुलाला सहा दिवसांची पोलिस कोठडी सुनावली आहे. पुढील तपास पोलिस निरीक्षक निखिल पालेकर यांच्या मार्गदर्शनाखाली उपनिरीक्षक दत्तप्रसाद पंडित करत आहेत.