पेडणे: पोटच्या मुलाने आईवर कोयत्याने जीवघेणा हल्ला केला, यात आई गंभीर जखमी झाली आहे. पेडणे तालुक्यातील आगरवाडा येथे रविवारी (१५ जून) ही घटना घडली. याप्रकरणी पेडणे पोलिसांनी २५ वर्षीय मुलाला अटक केली आहे. तर, जखमी महिलेवर बांबोळी येथील गोवा वैद्यकीय महाविद्यालयाच्या रुग्णालयात उपचार सुरु आहेत.

 चंद्रशेखर चंद्रकांत पाटील (वय २५, रा. आगरवाड, पेडणे) असे अटक करण्यात आलेल्या मुलाचे नाव आहे. सुषमा कळंगुटकर यांनी याप्रकरणी तक्रार दाखल केली आहे.

चंद्रशेखर आणि त्याची आई यांच्या रविवारी दुपारी वाद झाला. वादातून त्याने आईला शिवीगाळ करत ‘आज तुला दाखवतोच’, म्हणत कोयत्याने वार केले. यात महिला गंभीर जखमी झाली आहे.

मुलाने रागाच्या भरात आईचे डोके, मानेसह छातीवर कोयत्याने गंभीर वार केले. यात महिला गंभीर जखमी झाली असून, रक्तबंबाळ झाली. जखमी महिलेला उपचारासाठी गोमेकॉत दाखल करण्यात आले आहे. महिलेची प्रकृती चिंताजनक आहे. पोलिसांनी मुलाला अटक केली असून, याप्रकरणी अधिक तपास सुरु आहे.