Som Yag Yadnya Festival 2023 Goa

गोमन्तक-सकाळ माध्यम समूहातर्फे आयोजित अग्निष्टोम महासोमयागाचा आज (शुक्रवारी) शेवटचा दिवस आहे. अवभृत स्नानाने (नदीकाठी स्नान) या यागाची सांगता होणार आहे.

काणका येथील विश्वाटी विश्वेश्वर देवस्थान परिसरात विश्वशांतीसाठी अग्निष्टोम महासोमयागाचं आयोजन करण्यात आले होते. 5 फेब्रुवारी रोजी हा महासोमयाग सुरू झाला होता.

शुक्रवारी या सोमयागाची अवभृतईष्टी व पूर्णाहुती होईल. त्यानंतर दोन ईष्टी होऊन यज्ञाची सांगता होईल. अशी माहिती गुरुजी सिद्धांत गाडगीळ यांनी दिली.

• पाचव्या दिवशी पार पडल्या या विधी

सकाळच्या विधीसत्रात स्वर्गप्रवेश देखील झाला. या विधीअंतर्गत सोमयागाचे यजमान सोमयाजी सुहोता दीपक आपटे आणि सुहोता समृद्धी दीक्षित आपटे या दाम्पत्यासह आपटे कुटुंबीयांनी डोक्यावर धोतर धरून सभामंडपात प्रवेश केला.

याच कृतीला ‘स्वर्गप्रवेश’ असे म्हटले जाते. यावेळी विविध वेदमंत्रांचे पठण करण्यात आले. गुरुवारी पाचव्या दिनी सभामंडप झेंडूची फुले तसेच केळीची झाडे यांनी आकर्षकरित्या सजवलेला होता.