Jumping Chicken

पावसाळ्यात गोव्यात जंपिंग चिकन म्हणून प्रसिद्ध असलेल्या बेडकांची शिकार तसेच, तस्करीच्या घटना उघडकीस येत असतात. असेच कारवारमधून गोव्यात येणाऱ्या 42 बेडकांच्या तस्करीचे प्रकरण उघडकीस आले आहे. कारवार वन विभागाच्या अधिकाऱ्यांनी याप्रकरणी कारवाई करत एका खासगी बस चालकाला अटक केली.

मिळालेल्या माहितीनुसार, कारवार -गोवा मार्गाने एका खासगी बसमधून 42 बे़डकांची गोव्यात तस्करी केली जात होती. गोव्यात बड्या हॉटेलमध्ये जंपिंग चिकन म्हणून हे प्रसिद्ध आहे. यासाठी बेडकांची तस्करी केली जात असल्याचे कारवार वन विभागाला माहिती मिळाली होती.

अधिकाऱ्यांनी कोडीबाग येथे सापळा रचून संशयित खासगी बसची तपासणी केली असता त्यात 42 बेडूक आढळून आले. अधिकाऱ्यांनी बस चालकाला अटक केली असून, तस्करी करणारा संशयित घटनास्थळावरुन फरार झाला. अधिकाऱ्यांनी 42 बेडकांना जीवदान दिले आहे.

दरम्यान, काही दिवसांपूर्वी बेडकांची करणाऱ्या दोघांना पोलिसांनी अटक केली होती. वेळ्ळी येथील फर्नांडीस आणि परेरा या दोघांना वन खात्याच्या अधिकाऱ्यांनी अटक केली होती.

बेडकांची गणती संरक्षित प्रजातीत होत असून त्यांची शिकार करण्यास कायद्याने बंदी आहे. शिवाय बेडूक जैवविविधतेतील महत्त्वाचा घटक असून बेडकांच्या माध्यमातून निसर्गातील अन्न साखळी समतोल राहते.