डिचोली: मये-डिचोली येथील एकाच कुटुंबातील सहा जणांना अळंबी खाल्ल्यानंतर विषबाधा झाली आहे. त्यांना तातडीने बांबोळी येथील गोवा मेडिकल कॉलेज (GMC) मध्ये दाखल करण्यात आले असून, त्यांची प्रकृती स्थिर असल्याचे डॉक्टरांनी सांगितले आहे.

मिळालेल्या माहितीनुसार, या कुटुंबातील सदस्यांनी डिचोली बाजारातून अळंबी विकत घेतली होती. ती घरी आणून शिजवून खाल्ल्यानंतर त्यांना उलट्या, जुलाब आणि पोटदुखीचा त्रास सुरु झाला. लक्षणे दिसताच, त्यांना त्वरित जीएमसीमध्ये हलवण्यात आले.

दरम्यान, अळंबीमधून होणाऱ्या विषबाधेची ही पहिलीच घटना नाही. पावसाळ्यात अनेकदा जंगली अळंबी बाजारात येतात, ज्या विषारी असण्याची शक्यता असते. नागरिकांनी अळंबी विकत घेताना आणि खाताना विशेष काळजी घ्यावी, तसेच खात्रीशीर ठिकाणाहूनच ती खरेदी करावी, असे आवाहन आरोग्य विभागाने केले आहे.