Goa News: येथील मासळी मार्केटात विक्रेत्यांकडून बेकायदा वाहने कुठेही, वेडीवाकडी उभी केली जातात. ही एक मोठी समस्या निर्माण झाली होती. याबाबत संबंधित वाहनचालकावर शुक्रवारी मार्ना-शिवोली पंचायत, हणजुण पोलिसांकडून दंडात्मक कारवाई करण्यात आली.

सरपंच शर्मीला वेर्णेकर, उपसरपंच विलीयम फर्नांडिस, पंच संदेश हडफडकर, सिंपल धारगळकर, अमीत मोरजकर तसेच हणजुण वाहतूक पोलिस कक्षाचे पोलिस अधिकाऱ्यांनी कारवाई भाग घेतला.

तारची- भाट परिसरात मासळी विक्रीसाठी सिंधुदुर्गातील शिरोडा, वेंगुर्ला तसेच मालवण येथून मासळी विक्रीसाठी येणारे वाहनचालक दिवसभर आपली चारचाकी वाहने येथील पार्किंग क्षेत्रात कुठेही, कशीही ठेवतात. त्यामुळे बाजारहाट करण्यासाठी येणाऱ्यांची गैरसोय होते. वाहने कुठे उभी करावी, ही मोठी समस्या निर्माण होते.

वाहन पार्किंगला शिस्त लावावी, अशी स्थानिकांची मागणी होती. त्यामुळे आज पंचायत व पोलिसांनी ही कारवाई केली. याबाबत शिवोलीतील समर्थन संघटनेचे अध्यक्ष प्रेमानंद आरोलकर, नितीन आगरवाडेकर यांनी पोलिस कक्षाचे निरीक्षक गौरीष परब, उपनिरीक्षक वामन नाईक आणि मार्ना-शिवोली पंचायत मंडळाचे अभिनंदन केले.