Goa Hit And Run case : राज्यात भरधाव वेगाने वाहने चालवून अपघातास निमंत्रण देण्याचे प्रकार वाढतच आहेत. अशीच एक अपघाताची घटना ताळगाव पठारावर घडली आहे. येथील श्‍यामा मुखर्जी स्टेडियमजवळ झालेल्या अपघातात दुचाकीस्वार महिला गंभीर जखमी झाली असून तीला गोमेकॉत भरती करण्यात आले आहे.

आगशी पोलिसांनी दिलेल्या माहितीनुसार, ताळगाव येथे राहत असलेली एक महिला दुचाकीने दोनापावल ते बांबोळीच्‍या दिशेने जात होती. यावेळी त्या श्‍यामा मुखर्जी स्टेडियमजवळ पोहचल्या असता मागून आलेल्या एका गाडीने त्यांच्या स्कुटरला ठोकर दिली.

या धडकेत महिलेचे दुचाकीवरील नियंत्रण सुटल्याने त्या खाली पडल्याने त्यांच्या डोक्याला जबर दुखापत झाली. जखमी महिलेला तात्काळ गोमेकॉत दाखल करण्यात आले. तर धडक देणारा गाडीचा चालक अपघातानंतर न थांबता त्याने तेथून पळ काढला.

याप्रकरणी पोलिसांनी गुन्हा नोंद केला आहे. सीसीटीव्ही कॅमेराच्या मदतीने गाडी चालकाचा शोध घेण्यात आला असून उद्या त्याला गाडीच्या दस्तावेजासह पोलिस स्थानकात बोलवण्यात येईल असे पोलिसांनी सांगितले.