37th National Games 2023: `गोव्याच्या सरकारने माझे राजकीय महत्त्व कमी करण्यासाठीच मला डावलणे चालविले आहे आणि मी गोवा ऑलिंपिक असोसिएशनचा अध्यक्ष असतानाही राष्ट्रीय क्रीडा स्पर्धेत मला खिजगणतीत घेतले नाही, अशी तक्रार केंद्रीयमंत्री श्रीपाद नाईक यांनी केंद्रीयमंत्री राजीव चंद्रशेखर यांच्यापुढे भाजप समर्थक आमदारांसमोर केली,

परंतु हा प्रकार तेथे उपस्थित असलेल्या भाजपच्या प्रमुख नेत्यांनी हसण्यावारी नेल्याची माहिती उपलब्ध झाली. आश्‍चर्य म्हणजे, श्रीपाद नाईक पाचवेळा खासदार म्हणून जिंकून आले असून आपली कैफियत ते राज्यसभेवर निवडल्या गेलेल्या राजीव चंद्रशेखर यांच्यापुढे मांडत होते. ‘‘मी गोवा ऑलिंपिक असोसिएशनचा अध्यक्ष असतानाही राष्ट्रीय क्रीडा स्पर्धेच्या गोव्यात होणाऱ्या कार्यक्रमांमध्ये माझा कोणताच सहभाग ठेवलेला नाही’’, अशा नेमक्या शब्दांत श्रीपाद नाईक यांनी आपली खंत व्यक्त केली.

आपल्याला स्थानिक राजकारणात विश्‍वासात घेतले जात नाही, आमंत्रणेही आपल्याला मिळत नाहीत, अशी तक्रार श्रीपाद नाईक यांनी लोकसभा निवडणुकीच्या तयारीसंदर्भातील या बैठकीत व्यक्त केली. मुख्यमंत्रिपदी मनोहर पर्रीकर असताना श्रीपाद नाईक आपल्यावर अन्याय होत असल्याची तक्रार करायचे व राज्यात मुख्यमंत्री म्हणून नेमणूक व्हावी म्हणूनही त्यांनी अनेक प्रयत्न केले आहेत. परंतु भाजपमध्ये त्यांची अवहेलना सुरू आहे,

ही बाब भाजपच्या काही ज्येष्ठ नेत्यांनीही ‘गोमन्तक’शी बोलताना मान्य केली. पंतप्रधान नरेंद्र मोदींबरोबर मुख्यमंत्री प्रमोद सावंत यांच्याबरोबर प्रदेशाध्यक्ष तथा राज्यसभा खासदार सदानंद शेट तानावडे होते व स्टेडियमवर एस्कॉर्ट करण्याचे कामही या दोन्ही नेत्यांनी केले. स्वत: पंतप्रधानांनीही आपल्या भाषणात केंद्रीय मंत्री असलेल्या श्रीपाद नाईक यांचे नाव घेतले नाही, मात्र केंद्रीय क्रीडामंत्री अनुराग ठाकूर यांचे नाव घ्यायला ते विसरले नाहीत.