मोरजी : नागरी उड्डाण खात्याचे संचालक ठामपणे सांगत आहेत, की आम्ही सर्व उच्च न्यायालयाने घालून दिलेल्या अटीनुसार 5 लाख झाडे लावली. पण हा त्यांचा खोटारडेपणा असून आम्हाला मिळालेल्या माहितीप्रमाणे 5 झाडेही त्यांनी लावलेली नाहीत. लावलीच असतील तर संघटनेला आणि पेडणेतील पत्रकारांना सोबत घेऊन ती दाखवावीत, असे आव्हान मोपा विमानतळ पंचक्रोशी पीडित जनसंघटनेचे भास्कर नारूलकर व इतरांनी नागरी उड्डाणच्या अधिकाऱ्यांना दिले आहे.

नागरी उड्डाण खात्याचे संचालक जी माहिती संबंधित खात्यांना व मुख्यमंत्र्यांना देत आहेत, ती माहिती पूर्णपणे खोटी असून आमचा त्यांच्यावर आता अजिबात विश्वास राहिलेला नाही.

ते अधिकारी स्वतः सरकारी अधिकारी आहेतच पण ते विमानतळ बांधणाऱ्या कंपनीचे संचालकही आहेत. तसेच मोपा प्रकल्प विकास प्राधिकरणचे सदस्य आहेत. तसेच या मोपा विमानतळ प्रकल्पात पन्नास टक्के भागीदार असल्याने ते मोपा विमानतळासंबंधित सर्व माहिती लोकांपासून तसेच संबंधित अधिकाऱ्यांपासून, सरकारपासून लपवत आहेत.

मुख्यमंत्र्यांनी या प्रकरणात लक्ष घालावे तसेच पेडणेच्या आमदारांना या अधिकाऱ्यांसोबत फक्त फोटो न घेता लोकांना घेऊन तसेच नागरी उड्डाण खात्याच्या संचालकांना घेऊन विमानतळ बांधणाऱ्या कंपनीच्या संबंधित अधिकाऱ्यांना घेऊन बैठक बोलावून लोकांच्या समस्या तसेच शंका दूर कराव्यात, अशी मागणी मोपा पीडित जनसंघटनेचे भास्कर नारूलकर यांनी केली आहे.

पेडनणेचे आमदार प्रवीण आर्लेकर मोपा विमानतळावर जाऊन अधिकाऱ्यांसोबत फोटो काढत आहेत. त्यांनी फक्त फोटो काढू नयेत, तर पंचक्रोशीतील पीडितांच्या भवितव्याबाबत अधिकाऱ्यांशी चर्चा करावी.आमदारांनी पत्रकार परिषद घेऊन लोकांना मुख्यमंत्र्यांच्या विधानाबद्दल 500 नोकऱ्यांच्या यादीसोबत माहिती द्यावी. ज्याची आज खूप मोठी गरज आहे. अन्यथा लोकांनी जी बाबू आजगावकरांची अवस्था केली, तीच यांची करावी लागेल. 7 दिवसात यादी न जाहीर केल्यास बाबूंसारखे आर्लेकरही बॅग आणायला मोपा विमानतळावर गेले होते, हे पंचक्रोशी पीडित जन संघटना लोकांना पटवून देईल,असा इशारा भरत बागकर यांनी दिला आहे.