Shiroda News : शिरोडा, गावातील पवित्र मंदिरासमोरील तलाव एकेकाळी गावातील नागरिकांचे जीवन स्त्रोत होते. या पाण्याचा उपयोग नित्यवापराबरोबरच शेती बागायतीसाठीही होतो.

म्हणून तलावांचे बांधकाम आणि सौंदर्यीकरण केल्यावर या तलावाची स्वच्छता आणि निगा राखण्यावर भर द्या, असे प्रतिपादन जलस्रोत खात्याचे मंत्री सुभाष शिरोडकर यांनी केले.

वाजे-शिरोडा येथील श्री मंडलेश्‍वर मंदिरासमोर असलेल्या तलावाची दुरुस्ती आणि सौंदर्यीकरण सुमारे ३२ लाख रु. खर्चून केली जात आहे. या कामाचा शुभारंभ ११ रोजी झाला. यावेळी मंत्री शिरोडकर बोलत होते.

याप्रसंगी देवस्थानचे अध्यक्ष म्हाडू ऊर्फ राजू प्रभूगावकर, जिल्हा पंचायत सदस्य नारायण कामत, सरपंच पल्लवी शिरोडकर, पंचायत सदस्य सुहास नाईक, शिरोडा भाजपमंडळ अध्यक्ष सूरज नाईक, शिवानंद नाईक,

आनंद खांडेपारकर, देवालयाचे अर्चक महेश परांजपे, बबन शिरोडकर, चंद्रकांत हेदे, अभियंते सचिन शिरोडकर, संदेश पैंगीणकर आदी मान्यवर उपस्थित होते.

शिरोडकर यांच्या हस्ते भूमीपूजन करून व श्रीफळ वाढवून या कामाचा शुभारंभ करण्यात आला. सरपंच पल्लवी शिरोडकर यांनी स्वागत केले. तर पंचसदस्य सुहास नाईक यांनी आभार मानले.