पणजी: उत्तर गोव्यातील समुद्रकिनारी शॅक चालवणाऱ्या काही मालकांनी रात्री 11 वाजल्यानंतरही शॅक सुरु ठेवण्याची मागणी केली आहे. रात्री उशिरा पर्यटक समुद्र किनाऱ्यावरील शॅकमध्ये येत असल्याने उशिरापर्यंत शॅक सुरु राहिल्यास व्यवसायाला चालना मिळू शकते, असा दावा काही शॅकमालकांनी केला आहे. मात्र, धोरणाचे पालन करुन व्यवसाय करणेही महत्त्वाचे असल्याचे देखील त्यांनी मान्य केले.

गोवा राज्य शॅक धोरण 2023-26 नुसार शॅक (Shacks) सकाळी 7 वाजता सुरु होऊन रात्री 11 वाजेपर्यंतच चालवण्याचा नियम आहे. शॅकमालकांना व्यवसायाच्या दृष्टीने अडचणी येत असल्या तरी कायद्याचे पालन करणे महत्त्वाचे आहे.

कायदा सर्वांना समान

शॅकमालक कल्याण संघटनेचे सरचिटणीस जॉन लोबो म्हणाले की, ज्यांनी 1 वाजेपर्यंत मद्यविक्रीचा परवाना घेतला आहे, त्यांना नियमानुसार शॅक चालवण्याची परवानगी मिळायला हवी. मात्र, परवाना नसताना उशिरापर्यंत शॅक चालवणे योग्य नाही. कायदा सर्वांना समान.

...तर शॅक व्यावसायिकांविरुद्धही कारवाई

सध्या किनारपट्टीवरील शॅक तसेच हॉटेलमध्ये (Hotel) रात्री 10 वाजल्यानंतर संगीत बंद करण्याची तसेच मद्य विक्रीचा परवानाच्या वेळेनंतर विक्री झाल्यास कारवाई करण्यात येत आहे. रात्री उशिरा मद्य विक्री परवान्याचे उल्लंघन करुन होत असल्याने त्यावरच लक्ष ठेवण्यात येत आहे, अशी माहिती पर्यटन पोलिस विभागाच्या एका अधिकाऱ्याने दिली. नियमांचे काटेकोरपणे पालन न झाल्यास शॅक व व्यावसायिकांविरुद्ध कारवाई करण्याच्या सूचना वरिष्ठांनी दिलेल्या आहेत, त्यानुसार कार्यवाही होत असल्याचे त्यांनी दिली.