सासष्टी: दक्षिण गोवा जिल्हा इस्पितळ जवळील सीवेज चेंबरमधून सांडपाणी गळती होऊन येथील शेतात वाहत आहे. जवळच रुग्णालय आणि प्रेझेंटेशन कॉन्व्हेंट हायस्कूल असल्याने आरोग्याला धोका निर्माण झाला आहे. या सीवेज चेंबरची तत्काळ दुरुस्ती करण्याची मागणी स्थानिकांनी केली आहे.

दरम्यान, काही शेतकऱ्यांनी एकत्र येऊन याचा निषेध केला. पावलो फर्नांडिस यांनी याबाबत सांगितले की, ही वेळ शेतात लागवड करण्याची आहे, पण शेतात सांडपाणी भरल्याने आम्हाला काहीही करता येत नाही. आम्ही कित्येक वर्षांपासून येथे भात लागवड करीत आलो आहोत. मात्र यंदा लागवड करता येईल की नाही याचीच चिंता आहे असे त्यांनी सांगितले.

बेताळभाटीहून आपल्या मुलांना प्रेझेंटेशन हायस्कूलमध्ये पोहोचविण्यास येणाऱ्या पालकाने सांगितले की, या पाण्यातून जाण्यास भीती वाटत आहे. सांडपाण्याची गळती तत्काळ थांबली पाहिजे. नाही तर विद्यार्थ्यांना त्रास होण्याची शक्यता आहे.

आमदार, मंत्र्याने लक्ष द्यावे

समाजसेविका फेडोल परेरा यांनी सांगितले की, सीवेज पाइपलाइनचे काम मे महिन्याअगोदर पूर्ण व्हायला पाहिजे होते. स्थानिक आमदार व सार्वजनिक बांधकाम मंत्र्यांनी याकडे लक्ष देणे गरजेचे आहे.