Water Problem: भूमीगत वीज वाहिन्यांसाठी खोदकाम करताना जलवाहिनी फोडण्याचे प्रकार वारंवार होत असल्याने सत्तरीत अनेक भागांना तीव्र पाणी टंचाईचा सामना करावा लागत आहे. वाळपई ठाणे मार्गावर सोमवारी संध्याकाळी मुख्य जलवाहिनी फुटली.

वाळपई पालिका प्रभाग दहामध्ये गेल्या कित्येक दिवसांपासून या जलवाहिनीला गळती लागली होती, गळती वाढल्याने सोमवारपासून शेकडो लिटर पाणी वाया जात आहे. त्यामुळे वाळपई, वेळूस, कोपार्डे आदी भागात नळ कोरडे होते. ‘गोमन्तक टिव्ही’ ने याबाबत वृत्त प्रसारित केल्यानंतर पाणी पुरवठा विभागाने तातडीने जलवाहिनी दुरुस्तीचे काम हाती घेतले. संध्याकाळी उशिरापर्यंत हे काम चालले होते.

केरीत जलवाहिनी फोडली

भूमिगत वीज वाहिनीचे काम करताना घोटेली नं. 2, केरी येथे जलवाहिनीला मोठे भगदाड पडले आहे. शेकडो लिटर पाणी वाया जात आहे. दरम्यान, सालेली परिसरातील ७ वाड्यांवर दिवसाआड पाणी येत असल्याने तसेच काही भागात पाणी चढत नसल्याने लोकांचे हाल होत आहेत.