Serendipity Festival Fire: गोव्यातील हडफडे येथील नाईट क्लबला लागलेल्या भीषण आगीच्या दुर्घटनेची घटना ताजी असतानाच, राजधानी पणजी येथे कला अकादमीजवळ आयोजित करण्यात येत असलेल्या 'सेरेंडिपीटी' महोत्सवाच्या ठिकाणीही आज सोमवार (दि.८) रोजी संध्याकाळी आग लागल्याची माहिती समोर आली आहे. सुदैवाने, या घटनेत मोठा अनर्थ टळला असून, परिस्थितीवर त्वरित नियंत्रण मिळवण्यात यश आले आहे.

वेल्डिंगमुळे भडकला भडका

पोलिसांनी दिलेल्या माहितीनुसार, पणजी येथील कला अकादमीजवळ 'सेरेंडिपीटी' महोत्सवासाठी सेट तयार करण्याचे काम सुरू होते. याच ठिकाणी प्लायवूड (Plywood) आणि स्पंजसारख्या (Sponge) ज्वलनशील वस्तूंना आग लागली.

आगीच्या कारणाबद्दल प्राथमिक माहिती देताना पोलिसांनी सांगितले की, येथे उंचीवर वेल्डिंगचे काम सुरू होते आणि त्यातून उडालेल्या एका ठिणगीमुळे ही आग लागण्याची शक्यता आहे.

सुरक्षा कर्मचाऱ्यांच्या सतर्कतेमुळे मोठा अनर्थ टळला

या घटनेत सर्वात दिलासादायक बाब म्हणजे, अग्निशमन दल आणि पोलीस घटनास्थळी दाखल होण्यापूर्वीच कला अकादमीतील सुरक्षा कर्मचाऱ्यांनी आग विझवण्यात त्वरित यश मिळवले. त्यांच्या सतर्कतेमुळे आग अधिक पसरली नाही आणि कोणतीही मोठी हानी झाली नाही.

या घटनेत कोणालाही दुखापत झाली नाही, हे महत्त्वाचे आहे. गेल्यावर्षी देखील आयनॉक्स पणजी येथे सेटचे काम सुरु असताना आग लागली होती. यापूर्वी हडफडे येथील नाईट क्लबमध्ये आग लागून २५ निष्पाप लोकांचा जीव गेला होता.

सुरक्षा नियमांचे पालन पोलिसांचे आदेश

पोलिसांनी कला अकादमी, पणजी येथे सुरू असलेल्या 'सेरेंडिपीटी' महोत्सवाच्या तयारीमध्ये आवश्यक सुरक्षा नियमांचे कठोरपणे पालन करण्याचे आदेश दिले आहेत.