Selaulim Dam Water Level Decrease: यंदा अनियमित पावसामुळे राज्यातील पाण्याचा साठा कमी झाला आहे. सांगे तालुक्यातील साळावली धरणाच्या पाणलोट क्षेत्रात यावर्षी 23 वर्षातील सर्वाधिक पाऊस झाला असला तरी गेल्या वर्षीच्या तुलनेत जलसाठ्याची पातळी कमी आहे.

सोमवारी धरणातील पातळी 41.35 मीटर होती. गेल्या वर्षी याच तारखेला, कमी पाऊस असूनही पातळी 41.82 मीटर होती.

धरणाची देखरेख करणारे जलसंपदा विभागाचे (WRD) कार्यकारी अभियंता जेसन मिनेझिस यांनी दिलेल्या माहितीनुसार, यावर्षी साळावलीत विक्रमी पाऊस पडला असला तरी, केवळ काही भागांनाच सततच्या पावसाचा फायदा झाला आहे.

रविवार ते सोमवार सकाळ दरम्यान एकूण 9.8 मिमी पावसासह, पर्जन्यमापक केंद्राने सोमवारपर्यंत एकूण 3,465.4 मिमी पावसाची नोंद केली. गेल्या वर्षी हा आकडा 11 सप्टेंबरपर्यंत 3,167.2 मिमी इतका होता. साळावली धरणात सध्या 237.68 दशलक्ष घनमीटर (MCM) पाणीसाठा आहे.

धरणाची पूर्ण जलाशय पातळी (FRL) 41.15m आहे. सार्वजनिक बांधकाम विभाग (PWD) दररोज सुमारे 160 दशलक्ष लिटर (MLD) पाण्यावर प्रक्रिया करते. या धरणातील पाणी सांगे, केपे, सासष्टी, मुरगाव आणि फोंडा तालुक्यातील बोरी गावाच्या काही भागांना पुरवले जाते.

गेल्या वर्षीच्या तुलनेत जलसाठ्याची पातळी कमी असल्यामुळे भविष्यात पाण्याची टंचाई निर्माण होण्याची शक्यता व्यक्त केली जात आहे.